Binulan a Mensahe ti Para iti Pigsa dagiti Agtutubo , Septiembre 2025
Ni Jesucristo Pay Ti Para kadagiti Nasayaat nga Aldaw
No nasayaat a maar-aramid dagiti banag, kasano a mapagtalinaedtayo a nakapamaysa iti Mangisalakan? Dagitoy ti sumagmamano a kapanunotan.
Panunotem no ti maysa a gayyem ti nangbubos laeng iti panawen a kaduam idi agrigrigatda ken linlikannaka idi naragsakda. Nasalun-at kadi a relasion? Saan a talaga.
Aramidentayo kadi dayta iti Mangisalakantayo—sapulenyo Isuna kadagiti narigat a panawen ken lipatenyo Isuna kadagiti nasayaat a panawen?
Adu ti pagsasaritaantayo no kasano a tulongannatayo ni Jesucristo kadagiti narigat a panawentayo, nalabit gapu ta tunggal maysa, iti maysa a panawen wenno sabali, ket maipasango kadagiti narigat a banag.
Ngem adda dagiti aldaw—dagiti lawas wenno uray pay dagiti tawen, no nagasattayo—a maar-aramid dagiti banag a talaga a nasayaat. No dadduma malipatantayo ti Mangisalakan kadagita a panawen. Kasta ti inaramid idi dagiti tao ti Libro ni Mormon. Rimmang-ayda kadagiti bendision ti Dios iti sumagmamano a panawen ngem iti kamaudiananna natnagda iti kinatangsit idi nalipatandan Isuna.
Saan a kayat a sawen dagiti nasayaat a panawen a kellaat a ditay kasapulan ni Jesucristo. Dagiti panawen ti kinarang-ay ket dagiti naan-anay a panawen a makipagrag-o iti Mangisalakan, saan a manglipat Kenkuana.
Isu a kasano nga agtalinaedtayo a nakakonekta ken ni Jesucristo ken iti Amatayo iti Langit no dagiti pannubok ket saan a mangipalagip kadatayo nga umasideg Kadakuada?
Agtalinaed a Napakumbaba
No nasayaat a maar-aramid dagiti banag, nasayaat a rambakanyo dagiti bendision ken naileppasyo. Ngem saanyo a liplipatan no asino ti namagbalin a posible nga addakayo iti kasasaadyo. Kastoy ti panangisao ni Ari Benjamin iti sermonna iti Libro ni Mormon:
“Ta adtoy, saantayo, aya, a makilimlimos amin? Saantayo amin, aya, nga italek iti isu met laeng a Nabiag, nga isu ti Dios, ti amin a sanikua nga adda kadatayo, ti taraon ken pagan-anay, ken ti balitok, ken ti pirak, ken ti amin a kinabaknang nga adda kadatayo?” (Mosiah 4:19).
Ti panagbalin a napakumbaba maipapan iti balligiyo babaen ti pananglagipyo iti inaramid ti Nailangitan nga Ama ken ni Jesucristo para kadakayo ket maysa a naindaklan a wagas a mangiraman Kadakuada kadagiti nasayaat a panawenyo.
Agtalinaed a Managyaman
Ti panagyaman ti maysa kadagiti kasayaatan a panglapped iti pannakkel ken panaglipat. Ti panagyaman iti Dios ti mangtulong kadakayo a manglaglagip Kenkuana ken iti amin a nasayaat nga inaramidna ken ti Anakna iti biagyo. Nasamay daytoy kadagiti nasayaat a panawen a kas met laeng kadagiti narigat a panawen.
Agtalinaed a Mannakaammo
Ti maysa kadagiti paggugusto a panangraut ni Satanas ket tapno “pagtalnaen, ken allilawenna[kayo] iti nailubongan a talged” (2 Nephi 28:21). Iti sabali a pannao, pagay-ayatna no mariknayo ti pannakapnek ken kinatalged unay kadagiti nasayaat a panawenyo tapno nalipatanyon no ania ti kapatgan. Isu a saanyo a lipaten ti Dios! No agtalinaedkayo a mannakaammo kadagiti saan a madmadlaw a pangallilaw ti kabusor ken sarangtenyo ida uray bayat dagiti nasayaat a panawenyo, mabalinyo ti agtalinaed a nasinged iti Nailangitan nga Ama ken ni Jesucristo.
Ti Naimbag a Pastor, ni Michael Malm
Agtalinaed a Nakasentro ken ni Cristo
Insuro ni Presidente Russell M. Nelson: “No ti pokus ti biagtayo ket maipapan iti plano ti Dios iti pannakaisalakan … ken ni Jesucristo ken ti ebangheliona, mariknatayo ti rag-o ania man ti mapaspasamak—wenno saan a mapaspasamak—iti biagtayo. Umay ti rag-o manipud ken gapu Kenkuana. Isu ti pagtaudan ti amin a rag-o.”
Kasano ti kasansan a mapanunotyo daytoy a kinapudno maipapan iti rag-o no nasayaat ti panagbiag? Saan laeng a makaliwliwa a balakad daytoy no narusanger dagiti banag. Kanayon a pudno daytoy, agraman dagiti kasayaatan nga aldawyo. Isu nga aramideyo ti amin a kabaelanyo a mangipamaysa ken ni Cristo, umay man ti dakes wenno nasayaat.
© 2025 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, September 2025. Ilokano. 19626 864