Bulanan nga Mensahe sa Para sa Kusog sang mga Lamharon, Septyembre 2025
Si Jesucristo Para Man sa Maayo nga mga Panahon
Kon maayo lang ang tanan, paano kita magpadayon nga nagatutok sa Manluluwas? Ari ang pila ka ideya.
Pamensara bala kon ang imo amigo maupod lang sa imo kon ginabudlayan sila kag ginalikawan ka na kon malipayon sila. Maayo bala ina nga relasyon? Daw indi guro.
Ginahimo ta man bala ina sa aton Manluluwas—ginapangita Sia sa tiyempo sang kabudlayan kag ginakalimtan Sia sa tiyempo nga maayo lang ang tanan?
Pirme kita nagaistorya kon paano kita ginabuligan ni Jesucristo sa tiyempo sang aton kabudlayan, tungod siguro kay ang tanan, sa lainlain nga panahon, nagaatubang gid sang kabudlayan.
Pero may mga inadlaw—sinemana, ukon tinuig pa gani, nga kon swertehon—maayo gid ang tanan. Kon kaisa nagakalimtan ta ang Manluluwas sa sina nga mga tiyempo. Natabo ina sa mga katawhan sa Libro ni Mormon. Nag-asenso sila tungod sa mga bugay sang Dios pero sang ulihi nangin biktima sila sang bugal sang ginkalimtan nila Sia.
Ang maayo nga mga panahon wala nagakahulugan nga gulpi lang indi ta na kinahanglan si Jesucristo. Ang tiyempo sang kahamungaya amo ang perpekto nga tinion para magkasadya upod sa Manluluwas, indi nga kalimtan Sia.
Gani paano kita magpabilin nga konektado kay Jesucristo kag sa aton Amay sa Langit kon wala ang mga pagtilaw nga nagapadumdom sa aton nga magdangop sa Ila?
Magpabilin nga Mapainubuson
Kon maayo lang ang tanan, maayo nga iselebrar ang imo mga bugay kag mga nalab-ot. Pero indi pagkalimti kon sin-o ang nagpatigayon nga malab-ot mo ang imo nalab-utan. Amo ini ang ginhambal ni Haring Benjamin sa iya wali sa Libro ni Mormon:
“Kay tan-awa, indi bala kita tanan mga manugpakilimos? Wala bala kita nagasandig sa amo man nga Persona, bisan ang Dios, para sa tanan nga manggad nga yari sa aton, para sa pagkaon kag panapton, kag para sa bulawan, kag para sa pilak, kag para sa tanan nga manggad sang tagsa ka sahi nga yari sa aton?” (Mosias 4:19).
Ang pagkamapainubuson sa imo kadalag-an paagi sa pagdumdom sa ginhimo sang Amay nga Langitnon kag ni Jesucristo para sa imo isa ka maayo nga paagi sa paglakip sa Ila sa maayo mo nga mga panahon.
Magpabilin nga Mapinasalamaton
Ang pagpasalamat isa sa pinakamaayo nga pangontra sa bugal kag pagkalipat. Ang pagpasalamat sa Dios makabulig sa imo nga madumduman Sia kag ang tanan nga kaayo nga ginhimo Niya kag sang Iya anak sa imo kabuhi. Pareho ini nga epektibo sa tiyempo sang kahamungaya kag sa tiyempo sang kabudlayan.
Magpabilin nga Nagabantay
Isa sa paborito nga taktika ni Satanas amo nga “pakalmahon niya, kag ili-ilihon [ka] sa dutan-on nga kasigurohan” (2 Nefi 28:21). Buot silingon, manamian gid na sia kon kontento ka na kag kalmado sa maayo nga tiyempo nga malimtan mo na kon ano ang importante. Gani, indi pagkalimti ang Dios! Kon padayon ka nga nagabantay sa pasimple nga pagpanginto sang kaaway kag pakigbatuan ini sa maayo nga mga panahon, makapabilin ka nga malapit sa Amay nga Langitnon kag kay Jesucristo.
The Good Shepherd [Ang Maayong Manugbantay], ni Michael Malm
Magpabilin nga Nakasentro kay Cristo
Si Pangulong Russell M. Nelson nagtudlo: “Kon ang tutok sang aton mga kabuhi yara sa plano sang kaluwasan sang Dios … kag kay Jesucristo kag sa Iya ebanghelyo, makabatyag kita sang kalipay walay sapayan sang nagakatabo—ukon wala nagakatabo—sa aton mga kabuhi. Ang kalipay nagahalin sa Iya kag bangud sa Iya. “Sia ang ginhalinan sang tanan nga kalipay.”
Kada san-o mo ginapamensar ining kamatuoran parte sa kalipay kon maayo ang dalagan sang imo pangabuhi? Indi lang ini makapaumpaw nga laygay kon mabudlay ang tanan. Matuod ini pirme, pati sa maayo mo nga mga panahon. Gani himoa ang tanan para magtutok kay Cristo, bisan mag-abot ang mabudlay ukon maayo.
© 2025 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, September 2025. Hiligaynon. 19626 861