Bosoom bosoom Ma Mbabun Enya Ahoɔdzen Amandzɛɛbɔ, Fankwa 2025
Jesus Christ Wɔ Hɔ ma Nda a Oye no So
Ber a ndzɛmba rokɔ yie no, yebesi dɛn akɔ do etsim wɔ Agyenkwa no do? Adwenkyerɛ binom nyi:
Susu dɛ nyɛnko bi nye wo dzi mber wɔ hɔn nkodzen ber mu nko na wɔkwetsir wo ber a hɔn enyi gyee. Nkitahodzi a odzi mu a? Oho.
Ana yɛyɛ dɛm kyerɛ hɛn Agyenkwa—hwehwɛ No wɔ mber a ɔyɛ dzen no mu na hɛn werɛ fir no wɔ mber pa no mu?
Yɛtaa kasa fa mbrɛ Jesus Christ boa hɛn wɔ hɛn nkodzen mber mu, ɔbɛyɛ dɛ osiandɛ obiara, ber kor anaa ber bi, hyia dza ɔyɛ dzen.
Mbom nda bi wɔ hɔ—adapɛn anaa mfe mpo, a sɛ yedua yie a—ndzɛmba rokɔ yie ankasa. Ɔtɔfabi a hɛn werɛ fir Agyenkwa no wɔ dɛm mber no mu. Mormon Nwoma no mu nkorɔfo no yɛɛ. Mber bi woduaa Nyankopɔn ne nyhira do yɛɛ prɔmprɔm naaso wɔbɛyɛɛ ahantan ber a hɔn werɛ fir No.
Mber pa nnkyerɛ dɛ mpofir mu ara yennhia Jesus Christ bio. Prɔmprɔm mber yɛ mber a odzi mu dɛ yɛnye Agyenkwa no bɔ mu dzi dɛw, nnyɛ dɛ hɛn werɛ befir No.
Ntsi yɛyɛ dɛn nye Jesus Christ na Ɔsor Egya kɔ do nya nkitahodzi ber a ɔnnyɛ nsɔhwɛ na ɔrekaa hɛn dɛ yɛndan nkɔ Hɔn hɔ?
Kɔ do yɛ Ahobrɛadze.
Ber a ndzɛmba rokɔ yie no, oye dɛ ibedzi ehurusi wɔ wo nhyira na ndwuma pa horow mu. Mbom mma wo werɛ mmfir nyia ɔmaa ɔyɛ yie dɛ ewɔ bea a ewɔ no. Ɔhen Benjamin kãa no dɛm kwan yi do wɔ ne nkyerɛkyerɛ wɔ Mormon Nwoma mu:
Na hwɛ, ana hɛn nyina yɛnnserɛserɛ adze? Ana hɛn nyina yɛnndan Nyimpa kor, Nyame mpo, wɔ dza yɛwɔ nyina ho, edziban nye atar, sika nye dwetɛ, nye ahodze ahorow nyina a yɛwɔ? (Mosiah 4:19).
Ereyɛ ahobrɛase fa wo konyimdzi ho ber a erekaa dza Ɔsor Egya na Jesus Christ ayɛ ama wo yɛ kwan pa a edze Hɔn ka wo mber pa ho.
Kɔ do kyerɛ Enyisɔ.
Enyisɔ yɛ ahantan na awerɛfir hɔn ano edur papa kor. Ereda Nyankopɔn ase bɔboa wo ma akaa No na ndzepa a Ɔno na Ne Ba no yɛ wɔ w’abrabɔ mu. Iyi wɔ nsunsuando pa dɛmara wɔ mber pa nye mber a ɔyɛ dzen mu.
Kɔ do Hu Dza Ɔrokɔ Do
Satan no ɔsatu kor a ɔpɛ nye dɛ “ɔbɛma w’akoma atɔ wo yamu na wɔadaadaa [wo] ma edze wo werɛ atwer wiadze” (2 Nephi 28:21). Anaaso yɛbɛkã no dɛ, ɔbɔdɔ dɛ ibenya ɔmee na ahobambɔ nkãtse wɔ mber pa mu ara dɛ wo werɛ befir dza ohia tsitsir. Ntsi mma wo werɛ mmfir Nyankopɔn! Sɛ ihu ɔtamfo ne ndaadaa na eko tsia mpo wɔ wo mber pa mu a, ibotum akɔ do abɛn Ɔsor Egya na Jesus Christ.
Oguanhwɛfo Pa, Michael Malm yɛɛ nsaano mfonyin no
Kɔ do Tsim wɔ Christ do.
President Russell M. Nelson kyerɛkyerɛɛ dɛ, “Sɛ yɛdze hɛn abrabɔ tsim Nyankopɔn no nkwagye ho nhyehyɛɛ … na Jesus Christ N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.’’ No mu na osian Ɔno ntsi enyigye ba. Ɔno nye enyigye nyina ne farbaa.”
Mpɛn dodow ahen na edwen dɛm nokwar fa enyigye ho ber a abrabɔ rokɔ yie? Iyi nnyɛ afotu a ɔkyekye wo werɛ ber a ndzɛmba ayɛ basabasa nko. Ɔyɛ nokwar aber biara, wo nda apapa mu no ka ho. Ntsi yɛ dza ibotum biara fa tsim wɔ Christ do, bɔn mu o anaa papa mu o.
© 2025 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Monthly For the Strength of Youth Message, September 2025 ne nkyerɛase. Fante. 19626 502