Ɔfiɔŋ-ke-ɔfiɔŋ Etop Kabaŋa Nsɔŋɔnda eke Iwaad , Ɔfiɔŋ Usukkiet 2025
Jesus Christ Edi ɔnɔ Nti Usen Ŋko
Ke ini ŋkpɔ ɔfɔnde, didie ke nnyin ikeme editiene Andinyaŋa? Se mme esisit ekikere mi.
Kere nte edieke ufan kiet enyenede ini ndidu ye afo kpɔt ke ini mmɔ edude ke afanikɔŋ ndien esesin fi ke ini mmɔ ekedude ke inemesit. Nti ebuana? inehede idi ntre.
Nte akananam nnyin iminam oro ye Andinyaŋa nnyin—iyom Enye ke ini ŋkpɔ ɔsɔŋde edi ifre Enye ke ini ŋkpɔ ɔfɔnde?
Nnyin imitiŋ ediwak kabaŋa nte Jesus Christ aŋwamde nnyin osio ke mkpɔsɔŋ ini, ekpedi koro ofuri owo, ke ini kiet mme eken, eyenyene mkpɔsɔŋ ini.
Edi odu mme usuk usen—mme udua mme isua kpa, edieke nnyin inyenede mfɔniso—ke ebiet emi ŋkpɔ enehede ɔfɔn. Ke ubakini nnyin imifre Andinyaŋa ke mme ndaha-ini oro. Mbonowo eke Ŋwed Mormon ekenam ntre. Mmɔ ema eforo eto eridiɔŋ Abasi ke esisit ini edi ke akpatre ediduɔ eduk ntaŋidem ke ini mmɔ efrede Enye.
Ini Abasi iwɔrɔke ete ke nnyin ke idaha kiet iyomke Jesus Christ aba. Ini uforo edi mfɔn-ma ini ndidara ye Andinyaŋa, idihe ndifefre Enye.
ntem didie ke nnyin ikpidu inyene ebuana ye Jesus Christ ye Ete nnyin ke Enyɔŋ ke ini idomo mitighi nnyin ndiwɔŋɔre mbine Mmɔ?
Edu ke Nsuhɔre-idem
Ke ini ŋkpɔ ɔfɔnde, edi ŋkpɔ ke edidara mme eridiɔŋ ye nam-ŋkure mbufo. Edi ekufre enye emi akanamde oro emem ɔnɔ mbufo ndidu ke ebiet emi afo odude idahaemi. Edidem Benjamin esin oro ke usuŋ ukwɔrɔ-ikɔ esie ke Ŋwed Mormon ete:
“Nte kpukpru nnyin idihe mme ebeŋe-ebeŋe? Nte kpukpru nnyin idorike enyin ke Enye oro, kpa Abasi, ibaŋa kpukpru inyene emi nnyin inyenede, ibaŋa udia ye edisine-ŋkpɔ, ye gold, ye silver, ye kpukpru inyene emi nnyin inyenede ke utɔ ke utɔ?” (Mosiah 4:19).
Ndisuhɔre-idem kabaŋa edikut-unen mbufo ke nditi ŋkpɔ se Ete ke Enyɔŋ ye Jesus Christ ekenmade enɔ mbufo edi eti usuŋ ndidu ye Mmɔ ke mme nti ini mbufo.
Edu ke Edinɔ-ekɔm
Esit-ekɔm edi kiet ke otu nti edu-edikan ntaŋidem ye edifefre-ŋkpɔ. Edikɔm Abasi eyeŋwam mbufo nditi Enye ye ofuri nti ŋkpɔ emi Enye ye Eyen Esie enamde k uwem mbufo. Emi edi ukem-ukem nte ndinam ke nti ini nte edide ke mkpɔsɔŋ ini.
Edu ke Edifiɔk-mbaŋa
Kiet ke otu inem eŋwan Satan edi ndi “nam esit emem, nyuŋ mkpeme [mbufo] nsin ke obukidem” (2 Nephi 28:21). Ke ikɔ efen, enye eyema oro edieke mbufo enehede ekop uyuhɔ ye ubɔhɔ ke nti ini mbufo man mbufo efre mme ŋkpɔ emi enehede enyene-ufɔn. Ke ntre, ekufre Abasi! Ini emi mbufo efiɔkde ebaŋa mfefere ŋkari eke andidiɔk enyuŋ esin mmɔ kpa kini ŋkpɔ ɔfɔnde ye mbufo, mbufo eyekeme edidu mkpere Ete ke Enyɔŋ ye Jesus Christ.
Eti Ekpemerɔŋ, otode Michael Malm
Edu Ewuk-enyin ese Christ
President Russell M. Nelson ekpep ete: “Ke ini ediwuk-enyin eke uwem nnyin edide ke uduak erinyaŋa eke Abasi … ye Jesus Christ ye ikɔ-Abasi Esie, nnyin iyokop idara isehe se itibede—mme se mitibeke—ke uwem nnyin. Idara oto onyuŋ edi ke ntak Esie. Enye edi ntɔŋɔ ofuri idara.”
Esiwak didie ke nnyin ndikere kabaŋa akpanikɔ emi abaŋade idara ke ini uwem ɔfɔnde? Emi idihe ukem-ukem nte item ndɔŋesit ke ini ŋkpɔ ɔdiɔkde? Oro edi akpanikɔ ke ofuri ini, esinede ke mme nti usen mbufo. Ke ntre, enam kpukpru se mbufo ekeme ndibuɔt-idem ke Christ, ke ini ŋkpɔ ɔdiɔkde mme ke ɔfɔnde.
© 2025 eketode Intellectual Reserve, Inc. Ekpan kpukpru unen ndimiŋ ŋwed emi. Ekemiŋ ke USA. Enyime ndikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop eke Kabaŋa Nsɔŋɔnda eke Iwaad, Ɔyɔhɔ Ɔfiɔŋ Usukkiet 2025. Efik. 19626 553