’O vai e ’ere ’o te Atua

’O ’oia tō tātou Metua tāne, hau i te fa’ahiahia a’e i te metua tāne maita’i i te tāhuti nei, ’o tā ’outou e nehenehe e feruri. Noa atu ’aita tātou e ha’amana’o maita’i nei i tō tātou orara’a hou te tāhuti nei ’e ’oia, ’ua mātau ’oia ia tātou tāta’itahi ’e te pāpū maita’i. E tino ’i’o ’e te ivi maita’i roa tōna, ’e ’ua riro tātou mai tōna hōho’a.

Mai te peu tē fifi nei ’outou i te fa’ahōho’a mai te aha te huru o te Atua, tē vai ra hō’ē hi’ora’a maita’i roa : Tāna Tamaiti ’o Iesu Mesia. ’Ua parau te Mesia, « ’o vau te ’ē’a ’e te parau mau, ’e te ora, ’aore roa e ta’ata e tae i te Metua ra, maori rā, ’ei iā’u. ’Āhiri ’outou i ’ite na iā’u, ’ua ’ite ato’a ’outou i tā’u Metua » (Ioane 14:6–7). E nehenehe e parau, mai te peu e hina’aro tātou e ’ite mai te aha te huru o te Metua i te ao ra, e nehenehe tātou e ha’api’i mai mai te aha te huru o Iesu Mesia ! E mea hō’ē maita’i roa rāua i roto i te ’ōpuara’a.

’Oia ïa, te tauturura’a ia ’outou ’ia roa’a te ora mure ’ore ’o tāna ïa ’ohipa ’e tōna hanahana. O ’outou tāna rōtahira’a mātāmua roa ! ’Aita ’oia i tā’ōti’ahia e te taime mai ia tātou. ’A ti’aoro atu iāna nā roto i te pure i te mau taime ato’a. I muri iho, ’a fa’aro’o i te mau rāve’a e rave rahi tāna e pāhono mai.

’Ua ha’api’i na Elder Dale G. Renlund, « te fā a te Metua i te ao ra ’ei ti’ara’a metua, e ’ere ’ia rave tāna mau tamari’i i te mea maita’i ; ’o te vaiihora’a i tāna mau tamari’i ’ia mā’iti i te rave i te mea maita’i ’e i te hōpe’a ’ia riro mai iāna te huru ». E ani manihini ’oia ia ’outou, e a’o ia ’outou, ’e e ha’api’i ia ’outou i te parau mau, e’ita rā ’oia e fa’a’ere i tō ’outou ti’amāra’a ma te fa’ahepo ia ’outou ’ia pe’e iāna.

Maoti rā, mai tā Elder Patrick Kearon nō te pupu nō te Tino ’Ahuru ma Piti ’āposetōlo i parau, « te ’imi tu’utu’u ’ore te Atua ia ’outou », te aura’a e’ita roa ’oia e fa’aru’e i te tauturu ia outou ’ia ho’i mai iāna ra. ’Ua ’ite maita’i ’oia e fa’aruru iho ā tātou pā’āto’a i te mau fifi, ’ia rave ana’e tātou i te mau hape. Nō reira, tē pūpū mai nei ’oia ia tātou te hō’ē rāve’a ’ia tāmāhia tātou i te hara ’e ’ia ’ite mai i te pūai nā roto i te tāra’ehara a tāna Tamaiti.

E mea mure ’ore tōna here nō ’outou. ’Ua here ’oia ia ’outou i teienei, noa atu tō ’outou mau hapehape ! Tē hōro’a mai nei te peresideni Jeffrey R. Holland, mono peresideni nō te pupu nō te Tino ’Ahuru ma Piti ’āpōsetolo, i te hō’ē ha’apāpūra’a pūai nō ni’a i teie parau mau : « ’A haere mai mai tō ’outou huru’, ’ua parau te hō’ē Metua here ia tātou tāta’itahi, tē parau fa’ahou nei rā ’oia ē, ‘’eiaha e fa’anaho ’ia vai noa ’outou mai te reira te huru’. E ’ata’ata tātou ’e e ha’amana’o ē, ’ua fa’aoti te Atua ’ia fa’ariro ia tātou hau atu i tā tātou i mana’o e nehenehe tātou e riro mai ». Ma te here ’e te fa’aitoitora’a maita’i roa, tē tāmata nei te Metua i te ao ra i te tauturu ia ’outou ’ia riro mai iāna te huru ’e ’ia fa’ari’i i te mau mea ato’a tāna e vai ra, hō’ē ta’ahira’a i te taime hō’ē.

Te rāve’a maita’i a’e nō te mātau maita’i i tō ’outou Metua i te ao ra ’o te tāmaura’a ïa i te ora i te mau ’ohipa e tupu ra ’e ’ōna. Nāhea ? ’A ha’api’i mai nō ni’a iāna ’e tāna Tamaiti nā roto mai i te mau pāpa’ira’a mo’a ’e te mau parau a te mau peropheta ora. ’A pure iāna. ’A ha’apa’o i tāna mau fa’auera’a ’A rave i te taime marū ’e tō ’outou iho taime nō te ha’amori iāna i te fare purera’a, i te hiero ’e i roto i te tahi atu mau vāhi mo’a. ’A rave ’e ’a ha’apa’o i te mau fafaura’a ’e ’ōna. E tauturu ’oia ia ’outou ’ia mātau maita’i a’e iāna ’e ’ia ta’a maita’i i tōna mau nīno’a mana’o nō ’outou.