Dagiti Saan a Pudno- maipapan iti Kinasiasino ti Dios

Isu ti Amatayo, a nasaysayaat ngem iti uray pay ti kasayaatan nga ama iti daga a mapanunotyo. Nupay ditayo malagip ti biagtayo sakbay a nayanaktayo a kaduatayo Isuna, am-ammonatayo a saggaysa ken naan-anay. Addaan Isuna iti naan-anay a bagi a nagtagilasag ken nagtagitulang, ket naparsuatayo iti ladawanna.

No marigatankayo a mangiladawan no ania ti langa ti Dios, adda maysa a naan-anay a pagwadann: ti Anakna, ni Jesucristo. Kinuna ni Cristo, “Siak ti dalan, ken ti pudno, ken ti biag; awan ti makapan iti Ama no di magna kaniak. No am-ammodakon, nasken nga am-ammoyo met ni Amak” (Juan 14:6–7). Iti sabali a pannao, no kayattayo a maammuan no ania ti langa ti Nailangitan nga Ama, mabalintayo nga ammuen maipapan no ania ti langa ni Jesucristo! Naan-anay nga agkaykaysada iti panggep.

Kinapudnona, ti panangtulongna kadakayo a maaddaan iti biag nga agnanayon ket aramidna ken gloriana. Dakayo ti #1 nga ipangpangrunana! Saan a limitado wenno naigetan iti panawen a kas kadatayo. Makisaritakayo Kenkuana iti kararag iti aniaman nga oras. Kalpasanna dumngegkayo iti adu a wagas a panangsungbatna.

Naminsan nga insuro ni Elder Dale G. Renlund ti Korum dagiti Sangapulo-ket-dua nga Apostol, “Panggep a tun-oyen ti Amatayo iti Langit iti panagbalin a nagannak ket ti saan a panangpaaramid kadagiti annakna no ania ti umno; daytoy ket pagpilienna dagiti annakna nga agaramid iti no ania ti umno ken iti kamaudiananna agbalin a kas Kenkuana.” Awisennakayo, balakadannakayo, ken isuronakayo iti kinapudno, ngem dina ikkaten ti kinawayayo nga agpili babaen ti panangpilitna kadakayo a sumurot Kenkuana.

Imbes ketdi, kas kinuna ni Elder Patrick Kearon iti Korum dagiti Sangapulo-ket-dua nga Apostol, “Ti Dios ket awan sardayna a mangsapsapul kadakayo,” a kayatna a sawen a saanto pulos a sumuko Isuna a mangpadpadas a tumulong kadakayo nga agsubli Kenkuana. Ammona a gagangay a sanguentayonto amin dagiti narigat a banag no agbidduttayo. Isu nga ipaayna ti wagas tapno madalusantayo manipud iti basol ken maaddaantayo iti pigsa babaen ti Pannubbot ti Anakna.

Awan patinggana ti ayatna kadakayo. Ay-ayatennakayo itan, uray saankayo a naan-anay wenno adda pagkuranganyo! Ni Presidente Jeffrey R. Holland, Agak-akem a Presidente ti Korum dagiti Sangapulo-ket-dua nga Apostol, nangted iti nabileg a panangilawlawag maipapan iti daytoy a kinapudno: “‘Umaykayo a kas iti no ania ti kinataoyo,’ kuna ti maysa a managayat nga Ama iti tunggal maysa kadatayo, ngem inayonna, ‘Dikayo agplano nga agtalinaed no aniakayo iti agdama.’ Umisem ken laglagipentayo nga inkeddeng ti Dios a pagbalinennatayo nga ad-adda ngem iti napanunottayo a pagbalinantayo.” Babaen ti naan-anay nga ayat ken pammaregta, ikagkagumaan ti Nailangitan nga Ama a tulongannakayo nga agbalin a kas Kenkuana ken umawat iti amin nga adda Kenkuana, iti tunggal addang iti tunggal gundaway.

Ti kasayaatan a wagas tapno maam-ammoyo ti Nailangitan nga Amayo ket ti panangitultuloyyo a maaddaan kadagiti padas Kenkuana wenno agtultuloy a pannakilangen Kenkuana. Kasano? Agsursurokayo ti maipapan Kenkuana ken ti Anakna manipud kadagiti nasantuan a kasuratan ken balikas dagiti sibibiag a propeta. Agkararagkayo Kenkuana. Agtungpalkayo kadagiti bilinna. Bubosenyo ti naulimek, bukod a panawen a panagdaydayaw Kenkuana iti simbaan, iti templo, ken kadagiti dadduma pay a nasantuan a lugar. Agaramid ken agtungpal kadagiti katulagan Kenkuana. Tulongannakayonto a mangammo no asino Isuna ken no kasano ti riknana kadakayo.