Ayue nibe Yib Rok Yesus Kristus: Fare Fan nge Rogon

Napan e ngiyal’ nibe gafgow ko fare bayul ni tay, fare Tathapeg e rrin’ dalip i ban’en ni rib ga’fan:

1. I gel ko yam’, ni ngeyag ni ngaed fos gaed ko yam’.

2. Ke pi’ pilwon gubin mit e denen nibay, be bing kanawo’en e kalngaen nifan ngodaed, ni ngad chuchugur gaed ngak, ma gadaed sul ngak Got. Biney e kura ayuweg daed ni ngaed n’agfaned e gidii’ napan ni bayra denen gaed, ni bachan e ke fek Kristus e pi denen roraed ngak dakean.

3. Ke fek ngak gubin e denen, amith, tin bara ni yibear ar ngay nge mar (muguy ko Alma 7:11–13 ). Biney e be yipfan ni Ir e ri manang rogon ni nge ayuwegnem me gol nigem me pi’ gelngim ngam gel ko gafgow me ayuwegnem ngam mon’og.

Mel’eg reb e tin nibe yayawol nigem, ma rayag ni ngam guy nib peth rogon ngareb e pi dalipi n’ey nib riyul’.

Pi’in nib gafgow? Ya Yesus Kristus e ke yan u fithik’ gubin mit ban’en, ri manang rogon e biney. Gathi gubin ngiyal’ nima chuweg e gafgow, machane rayag ni nge pi’ gelngin e gidii’ nibe fek tomalngin e biney e gafgow (muguy ko Mosiah 24:15 ).

Daryag Rom? Bachan e Kristus e ke gel ko denen, ni tin ni daryag rodaed e dariyfan ni nge par rodaed ni n’umngin napan. Ya kalngaen’ e mu’un e gay rogon ngay nge rogon ni ngad boeded facha’ ni manang nrayag rodaed ni ngad manged.

M’aar? Bachan e ke gel ko yam’, nrayag ni ngad fosgaed ko yam’ ni gadaedra thapeg e dogur ma dakuriy bi’id ni gadaedra m’ar fa yib e amith ngodaed. Ya Kristus e ki “[fek] nga dakean … e pi mʼar ko gidiiʼ rokʼ” ( Alma 7:11 ), ni’ir e cha’ nib polo’ nrayag ni nge pi’ e gaps nge ayuw.

Machane dariy fan ni gadaed manang fan ni fare Tathapeg e ir fare fulweg riy (ni bachan e gadaed manang ko mini’ ma gadaed manang ko mang e ke rrin’ nifan ngodaed), ya kab tu’uf ni ngad nanged rogon nima yib e ayuw rok ngodaed nge rogon nima pi’ gelngindaed. Ba’aray boech kanawo’en:

Meybil. Meybil u dakean fithingan Yesus Kristus, ya gidii’ ni woed gadaed e rayag ni ngaed nonad ngak e Got nib polo’. Rayag ni ngad meybil gaed ni nge pi’ gelngindaed ko tin nib tu’uf rodaed ni demuturug rogon, ya Got era fulweg taban—ni gathi woed rogon ni gadaed ba’adag fa gadaed be athapeg, machane rogon nrayag ni nge tawa’ath nagdaed. Mulwol rok’ fare Tathapeg e bay ni rib riyul’: “Mu ninged, min piiʼ ngomed” ( John 16:24 ; 3 Nephi 27:29 ; Doctrine and Covenants 4:7 ).

Fare Tawa’ath ko fare Kan ni Thothup. Chitamangiy nu Tharmiy, Yesus Kristus, nge Kan ni Thothup e yaed ba ta’areb fanraed. Yaed ma muruwel u ta’abang! Gubin ngiyal’ ni gara thamiy e gapas nge powi’iy nibe yib rok’ fare Kan ni Thothup, ma rayag ni ngam tafney nag ni Kristus e kube pi’ e ayuw ngom.

Ayuweg fapi M’ag. Elder Dale G. Renlund ko fare Ulung ko fare Ragag nge La’agruwi Apostle e ke machib nag: “Fare bugithin ni kanawo’en e m’ag e be yipfan fapi m’ag ni rayag ni ngad bad ngak Kristus ma gadaed puthuydaed ngak. U dakean ere m’ag ney, ma rayag ngodaed fare gelngin nib manechubog” ( Apr. 2023 general conference [Liahona, May 2023, 36]).

Murnguy. Napan ni gadaedra gay rogon e mich ngak Yesus Kristus, mrayag ni ngad thapegned boech e ayuw (ni kanoeg e murnguy ngay) ko rrin’ boech ban’en ndabiyag u gelngindaed ni ngad rrin’ed ni yigogadaed, “ Grace ”). Biney e gelngiy, fa murnguy, e rayag ni nge yib ni bo’or mit rogon: yib ko fare Kan ni Thothup, reb e tafagar, be’ ni dannang, fa reb e thamtham. Gowawoed ni gubin ban’en nib mangil e be yib rok’ Kristus (muguy ko Moroni 7:22 ). Napan ni gara pire’eg ni be yib buchi gamaen’ ngom, fa yib buchi gelngim ni ngam athamgil, muguy ni biney e ir Kristus nibe ayuwegnem.

Ere yan migid nib tu’uf e fulweg taban e duwer ngom, fa ban’en ni gabe tafney nag, mu sap ngak Kristus. Mu tay u wun’um ni bachan e gel ni tay ko denen, yam’, nge gubin ban’an nu fayleng, dariy ban’en ndabiyag i rrin’. Mu sap ko rogon nibe tawa’ath nigem, ma gara guy ngongolen ulan e yafos rom. Ri gab tu’uf rok nib rib gel!