Kahsruh sin Jisus Kraist: Efuh ac Fuhkah

Ke El muhtwacnglah kihsacn iwaclah Lal, Mwet Lahngo El oraclah ma yohk srihpac tolu:

1. El kuhtanglah misac, ma lwelah kuht in sifil moulyak.

2. El molwelah molin ma koluk nuhkwewa, suc oruh kuht in kuh in auliyak, kapwack, ac fohlohk nuh yurun God. Ma se ingacn kahsre kuht pac in nuhnakmuhnahs nuh sin mwet sahyac ke elos oruh ma koluk, ke srihpen Kraist El eislah ma koluk lalos nuh facl Sifacna.

3. El kweok ke kain in waek, ongaiyac, mwe sruhf, mas, ac kweok nuhkwewa (liye Alma 7:11–13 ). Kalmac pa El etuh lah El ac kahsre kom ac unwekomlac fuhkah ac [El] kuh in ahkkweye kom in muhtwacnglah ma upac srihke in wolac liki met ah.

Sulaclah oacna sie ma elyah an, ac kom kuh in kuhpahsri top nuh kac an fohlohk nuh ke sie kuh kuhtuh sin ma pwacye tolu ingacn.

Kwacoh? Ke srihpen Jisus Kraist El puhlakihn ma nuhkwewa, El etuh na pwacye lah fuhkah ohiyac. El tiac kwacna eislah ma kohsrkohsr, tuhsruhk El kuh in ahkkweye mwet uh in muhtweng ma toasr (liye Mosiah 24:15 ).

Tahfonglac? Ke srihpen Kraist El kuhtanglah ma koluk, tahfonglac lasr uh tiac enenuh in kawihl. Auliyak pa in ahkwoyelah ac eklac oacna mwet se ma El etuh muh kuht kuh in oacna.

Mas? Ke srihpen El kuhtanglah misac, kuht fah sifipac moulyak ke mahno wolacna ma tiacna kuh in masack ac puhlakihn ngal. Kraist El oacyacpac “[eis] nuh Facl … mas” ( Alma 7:11 ), ma oruh tuh El pa mwet suwohswohs se in ahkkweye ac kahsruh.

Tuhsruhk finne kuht etuh lah efuh Mwet Lahngo pa top nuh kac uh (ke srihpen suc El uh ac meac El tuh oraclah nuh sesr), kuht srackna enenuh in etuh lah kuht e eis fuhkah kahsruh ac kuh Sel. Pa inge kuhtuh ohiyac:

Pruhe. Ke pruhe ke inen Jisus Kraist, mwet sesuwohs ma oacna kuht uh kuh in sramsram nuh sin God suwohswohs. Kuht kuh in pruhe nuh ke kuh ma kuht enenuhh ke kuhtwena ohiyac, ac God El fah topuk—tiac kwacna ke inkacnek ma kuht luhngse, tuhsruhk ke ohiyac ma fah ahkinsewowoye kuht. Solsol luhn Mwet Lahngo uh pwacye: “Siyuk ac kowos fah eis” ( John 16:24 ; 3 Nephi 27:29 ; Doctrine and Covenants 4:7 ).

Mwe Sang luhn Nguhn Muhtahl. Pahpah Inkuhsrao, Jisus Kraist, ac Nguhn Mutahl elos tuhkweni ke srihpac sefanna. Elos tuhkweni orekma! Oacna sie pacl kom puhlakihn kolyuck kuh ahkkweye sin Nguhn Muhtahl, kom kuh in etuh Kraist El kahsre kom pac.

Liyacacng Wuhlweacng. Elder Dale G. Renlund ke U luhn Mwet Sap Singucul Luo el luti: “Kahs se inge inkacnek in wuhlweacng som yohk nuh ke kain in wuhlweacng suc ma oruh kuht tuhkuh nuh yurun Kraist ac kuhpahsryang nuh Sel. Ke kuhpahsr in wuhlweacng se inge, oasr inkacnek lasr nuh ke kuh wacngihn sahflah Lal uh” ( Eprel 2023 toeni luhlahp [Liahona, Mei 2023, 36]).

Luhngkuhlwacng. Ke kuht oruh luhlahlfongi ke Jisus Kraist ac auliyak, kuht kuh in eis kahsruh ac kuh yohk (oacyacpac pahngpahng luhngkuhlwacng) in oraclah ma suc kuht tiac kuh in sifacna oraclah (liye Mwe Kol nuh ke Ma Suhmuhslah, “ Luhngkuhlwacng ”). Kuh se inge, kuh luhngkuhlwacng, kuh in tuhkuh ke inkacnek puhs: ke Nguhn Muhtahl, kawuck se, mwet sac se, ma puhlakihnyuck se. Ke Kraist ma wo nuhkwewa tuhkuh (liye Moroni 7:22 ). Ke kom muhtweng kuhtuh, fokokoi kuhtuh, kuh kuhtuh in muhtweng, akihlen lah ma ingacn pa Kraist El kahsre kom.

Pacl se tok ma kom enenuh top nuh ke kihsensiyuck kuh elyah se, ngwet nuh sin Kraist. Esam lah ke srihpen El kuhtanglah ma koluk, misac, ac ma upac nuhkwewa sahyac ke moul suhkawihl, wacngihn ma koflah. Suk lah El kuh in ahkinsewowoye kom fuhkah, ac kom fah liye mokleyuck Lal ke moul lom an. El luhngse kom na pwacye!