Te Ibuobuoki mairoun Iesu Kristo: Tera Bukina ao e Kanga Arona

Ngke E rinanon te mate ibukin ara bure, te Tia Kamaiu e karaoi teniua bwaai aika kakawaki:

1. E tokanikai iaon te mate, n kariaia mangautira.

2. E kabooi bure ni kabane, n karekea nakoira te aro n rairannano, rikirake, ao n okira te Atua. Anne e buokira naba n kabwarai aia bure aomata ngkana a bure nakoira, bukina bwa Kristo e anai nako Aona taian bure aikane.

3. E rinanon te marakira, karawawataakira, kariiriakira, aorakira, ao mamarara (taraa Aramwa 7:11–13). E nanonaki n anne bwa E ataa raoi aron buokara ao kamaiuara ao ni kona n kakorakoraira n kaitarai kataakira ao n keiaki n katamaroaira.

Rinea te kangaanga teuana, ao ko na kona n tomaiko nakon kaekana nakon teuana ke ae bati riki man taian koaua aika teniua aikai.

Te Kainano? Bukina bwa Iesu Kristo e rinanon bwaai ni kabane, E ataa arona. E aki ti kanakoa te kangaanga, ma E kona ni kakorakoraia aomata ake a rootaki n te kangaanga anne (taraa Motiaea 24: 15).

Kabwaka? Bukina bwa Kristo e tokanikai iaon te bure, kabwakara ana aki teimaan. Te rairannano e airi ma katamaroakira man riki bwa te aomata ae E ataira bwa ti kona n riki.

Aoraki? Bukina bwa E tokanikai iaon te mate, ti na bane ni mangauti ma rabwatara aika kororaoi n aki manga aoraki ao ni maraki. Kristo naba e “[katoka] iaona … aorakira” (Aramwa 7:11), n Karikia bwa te kabanea n tamaroa n aomata n anga te raunnano ao te boutoka.

Ma e ngae ngkana ti ataa bukina kai te Tia Kamaiu te kaeka (bukina bwa Antai ngaia ao tera ae E a tia n karaoia ibukira), ti riai naba n ataa arora n karekea te ibuobuoki ma te korakora mai Irouna. Aikai kawai tabeua:

Tataro. Man te tataro n aran Iesu Kristo, aomata aika aki kororaoi n ai arora ti kona n taetae ma te Atua ae kororaoi. Ti kona n tataro ibukin te kakorakoraaki n kangaanga nako, ao te Atua e na kaeka—tiaki n taainako n te anga are ti tangiria ke n kantaningaia, ma n te anga are ena tina kakabwaiaaki iai. Ana kakao te Tia Kamaiu e koaua: “Bubuti, ao ko na anganaki” (Ioane 16:24; 3 Nibwaai 27:29; Reirei ao Berita aika Tabu 4:7).

Te bwaintituaraoi ae te Tamnei ae Raoiroi. Te Tama are i Karawa, Iesu Kristo, ao te Tamnei ae Raoiroi a katiteuanaaki n aia botoniango. A uaia n mwakuri! N taai ake ko kainanoa kairam ke karauan nanom mairoun te Tamnei ae Raoiroi, ko kona n oota bwa Kristo e buokiko naba.

Kawakinan Berita aika a Tabu. E reirei Unimwaane Dale G. Relund: “te taeka ae kawain te berita e kaineti nakon rinanin berita are e karokoira nakon Kristo ao n reitaki ma Ngaia iai. Rinanon te kabaeaki n te berita aei, ti karekea Mwaakana ae akea tokina.” (Eberi. 2023 maungatabu ni kabuta [Riaona, Meei 2023, 36]).

Te Akoi. Ngkana ti kamwakura ara kakaonimaki iroun Iesu Kristo ao n raira nanora, ti kona n karekea te buoka ma te korakora ae bati riki (ae aranaki ma ana akoi te Atua) n kakoroi nanon bwaai ake tiaki kona n kakoroi i bon iroura (taraa Kairi nakon Koroboki aika Tabu, “Grace”). Te korakora aio, ke ana akoi te Atua, e kona n roko n anga aika bati: mairoun te Tamnei ae Raoiroi, raoraora, temanna ae tiaki kina, ke te namakin. Botona raoi, bwaai ni kabane aika tamaroa a roko mairoun Kristo (taraa Moronaai 7:22). Ngkana ko kona n karekea teutana te taotaonnano, te korakora riki teutana, te kakorakoraaaki riki teutana bwa kona teimatoa, kinaa bwa Kristo ae e buokiko.

Ngaia are n te tai are imwina are ko tangira te kaeka nakon te titiraki ke te kangaanga, taraa Kristo. Uringnga bwa man Ana tokanikai iaon te bure, mate, ao kangaangan te maiu ae mamate, akea te bwai ae aki kona n karaoia. Taratara Arona n kakabwaiako, ao kona nora Ana kairi inanon maium. E bati n tangiriko!