ຂ່າວສານປະຈຳເດືອນ For the Strength of Youth, ເດືອນມີນາ 2025

ເຮົາຈະດຳລົງຊີວິດຢູ່ໃນໂລກ ແລະ “ປ່ອຍວາງສິ່ງທີ່ເປັນຂອງໂລກນີ້” ໄດ້ແນວໃດ?

ພຣະຜູ້ເປັນເຈົ້າໄດ້ກ່າວວ່າ, “ເຈົ້າຈົ່ງປ່ອຍວາງສິ່ງທີ່ເປັນຂອງໂລກນີ້, ແລະ ສະແຫວງຫາສິ່ງທີ່ດີກວ່າ” (ຄຳສອນ ແລະ ພັນທະສັນຍາ 25:10). ນີ້ບໍ່ໄດ້ໝາຍຄວາມວ່າ ເຮົາບໍ່ສົນໃຈກັບຄວາມຕ້ອງການທາງໂລກ ແລະ ທາງດ້ານວັດຖຸ, ແຕ່ໝາຍຄວາມວ່າເຮົາບໍ່ໄດ້ເອົາໃຈໃສ່ກັບຄວາມຮັ່ງມີ, ອຳນາດ, ຕຳແໜ່ງ, ຫລື ການຍອມຮັບຂອງໂລກ. ຕໍ່ໄປນີ້ແມ່ນຫລັກທຳບາງຢ່າງທີ່ເຮົາໄດ້ຖືກສິດສອນກ່ຽວກັບການດຳລົງຊີວິດຢູ່ໃນໂລກ:

ໃຫ້ ສິ່ງທີ່ເປັນຂອງພຣະເຈົ້າ ເປັນອັນດັບໜຶ່ງ. “ຈົ່ງສະແຫວງຫາຣາຊອານາຈັກຂອງພຣະເຈົ້າ ແລະ ຄວາມຊອບທຳຂອງພຣະອົງ” (ມັດທາຍ 6:33). ໃນໃຈ ແລະ ຊີວິດຂອງເຮົາ, ພຣະບັນຍັດຂອງພຣະເຈົ້າ ແລະ ພັນທະສັນຍາຂອງເຮົາກັບພຣະອົງເປັນສິ່ງສຳຄັນທີ່ສຸດ.

ສະແຫວງຫາການຮຽນຮູ້. “ຂະນະທີ່ເຈົ້າຮຽນຮູ້ກ່ຽວກັບໂລກຢູ່ອ້ອມຕົວເຈົ້າ, ໃຫ້ຮຽນຮູ້ກ່ຽວກັບພຣະຜູ້ຊ່ວຍໃຫ້ລອດນຳອີກ. … ຍິ່ງເຈົ້າຮຽນຮູ້ຫລາຍເທົ່າໃດ, ເຈົ້າກໍຍິ່ງຈະສາມາດຊ່ວຍສ້າງສາອານາຈັກຂອງພຣະເຈົ້າ ແລະ ມີອິດທິພົນຕໍ່ໂລກໃນທາງທີ່ດີໄດ້ຫລາຍຂຶ້ນ” (ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ [2022], 31, 32).

ວຽກງານ. “ວຽກງານເປັນຫລັກທຳພຣະກິດຕິຄຸນທີ່ສຳຄັນ. ມັນສົ່ງເສີມການເຕີບໂຕ ແລະ ພັດທະນາເຮົາ. … ພຣະຜູ້ເປັນເຈົ້າບໍ່ພຽງແຕ່ປະສົງໃຫ້ເຮົາຈັດຫາໃຫ້ຄອບຄົວຂອງເຮົາເທົ່ານັ້ນ ແຕ່ໃຫ້ ‘ກະຕືລືລົ້ນໃນອຸດົມການດີ’ ນຳອີກ [ຄຳສອນ ແລະ ພັນທະສັນຍາ 58:27]” (“Employment,” Topics and Questions, ຫ້ອງສະໝຸດພຣະກິດຕິຄຸນ).

© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, March 2025. Laotian. 19628 331