Kasano nga agbiagtayo iti lubong ken “iwaksitayo dagiti banag a nailubongan”?

Dagiti Disipulo a Pinilina, ni Casey Childs

Kinuna ti Apo, “Iwaksimto dagiti banag a nailubongan, ket sapulem dagiti banag a nasaysayaat” (Doktrina ken Katulagan 25:10). Saanna a kayat a sawen a ditayo ikankano dagiti temporal ken material a kasapulantayo, ngem kayatna a sawen a saantayo nga italimudok ti puspusotayo iti kinabaknang, pannakabalin, saad, wenno pananganamong ti lubong. Adtoy ti sumagmamano a pagbatayan a naisuro kadatayo maipapan iti panagbiag iti lubong:

Ipangruna nga umuna dagiti banag ti Dios. “Birokenyo nga umuna ti pagarian ken ti Dios, ken ti kinalintegna” (Mateo 6:33).” Iti puso ken biagtayo, dagiti bilin ti Dios ken dagiti katulagantayo Kenkuana ti ipangpangrunatayo.

Agsursurokayo. “Bayat ti panagsursuroyo maipapan iti lubong iti aglawlawyo, agsursurokayo pay maipapan iti Mangisalakan. … Bayat nga ad-adu ti masursurom, ad-adda a makatulongka a mangbangon iti pagarian ti Dios ken mangimpluensia iti lubong nga agpaay iti pagimbagan” (Para iti Pigsa dagiti Agtutubo: Maysa a Pangiwanwan iti Panagpili [2022], 31, 32).

Agtrabahokayo. “Ti aramid ti napateg a pagbatayan ti ebanghelio. Mangpataud daytoy iti panagdur-as ken mangpasayaat kadatayo. … Saan laeng a kayat ti Apo nga ipaaytayo ti kasapulan dagiti pamiliatayo no di ket ‘siaanep a makiraman iti nasayaat nga aramid’ [Doktrina ken Katulagan 58:27]” (“Employment,” Topics and Questions, Gospel Library).