Paano kita magpangabuhi sa kalibutan kag “ipahigad ang mga butang sining kalibutan”?

The Disciples Whom He Had Chosen [Ang mga Disipulo nga Iya Ginpili], ni Casey Childs

Ang Ginuo nagsiling, “Ipahigad mo ang mga butang sining kalibutan, kag pangitaon ang mga butang sang mas maayo nga kalibutan” (Doktrina kag mga Kasugtanan 25:10). Indi ini buot silingon nga bale-walaon naton ang aton temporal kag materyal nga mga panginahanglan, kundi nagakahulugan ini nga indi naton paglagson kag unahon ang manggad, poder, posisyon, ukon pagdayaw sang kalibutan. Ari ang pila ka prinsipyo nga ginatudlo sa aton parte sa pagpangabuhi sa kalibutan:

Pasulabiha ang mga butang sang Dios una gid. “Pangitaa anay ninyo ang ginharian sang Dios, kag ang iya pagkamatarung” (Mateo 6:33). Sa aton mga balatyagon kag aton mga handum, ang mga kasugoan sang Dios kag aton mga kasugtanan sa Iya amo ang aton prayoridad.

Magpangita sang kinaalam. “Samtang nagatuon kamo parte sa kalibutan sa inyo palibot, magtuon man parte sa Manluluwas. … Kon mas damo ang inyo matun-an, mas makabulig kamo sa pagpasad sang ginharian sang Dios kag makaimpluwensya sa kalibutan para sa kaayuhan” (Para sa Kusog sang mga Lamharon: Giya sa Paghimo sang mga Pagpili [2022], 31, 32).

Obra. “Ang obra importante nga prinsipyo sang ebanghelyo. Nagadala ini sang pagtubo kag ginapauswag kita. … Indi lang nga gusto sang Ginuo nga tigan-an naton ang aton mga pamilya kundi nga ‘mangin mapisan sa pagpakigbahin sa maayo nga kawsa’ [Doktrina kag mga Kasugtanan 58:27] ” (“Employment,” Topics and Questions, Gospel Library).