Parau poro’i tā’āva’e Nō te pūai o te feiā ’āpī, Fepuare 2025
Tauturu nō roto mai i te puna maita’i roa a’e
Noa atu te huru o te mau ’arora’a tā ’oe e fa’aruru nei, e tauturu mai Iesu Mesia ia ’oe ’a fāriu ai ’oe iāna ra.
The Pattern [Te hōho’a], nā Jeanette Bourup
E tae i te tahi taime e hina’aro iho ā tātou pā’āto’a i te tahi tauturu. I te tahi taime e ma’a tauturu rahi. Te parau mau, ’oia ho’i, e mea maita’i a’e te orara’a mai te mea e ta’ata tō pīha’i iho.
’O Iesu Mesia te puna maita’i roa a’e nō te tauturu, te tīa’ira’a ’e te pūai. E nehenehe ato’a ’oia e tauturu ia ’oe i te maita’i a’e—pēnei a’e i te rāve’a ’aita ’oe i mana’o a’enei.
E tauiraʼa o te ʼāʼau
’Ua pure a’enei ’oe ’ia nehenehe te Atua e tāmarū i te ’ā’au o tō ’oe mau ’enemi ? ’Ia nā reira ’oe, tei roto ’oe i te pupu maita’i (hi’o 3 Nephi 12:44 ; Moroni 7:48). Noa atu ē ’aita tō ’oe e ’enemi mai terā i roto i te Buka a Moromona (’ua ’ite ’oe, te mau ’enemi e mauiha’a tama’i ’e tei ineine i te ’aro mai), ’ua pure paha ’oe ’ia tāmarū te Atua i te ’ā’au o te hō’ē ta’ata tei ’ore i hāmani maita’i ia ’oe.
Terā rā, ’ua feruri a’enei ānei ’oe ’ia pure ’e ’ia ani i te Atua ’ia tāmarū i tō ’oe ’ā’au ? Pēnei a’e tē fifi ra ’outou i te fa’a’ore i te hapa a te tahi ta’ata. ’E ’aore rā, e riri haere noa ’outou, noa atu ’aita ’outou e hina’aro ra. ’Aore rā tē hina’aro nei ’outou e fa’atupu i te mana’o au i ni’a i tō ’outou mau taea’e ’e mau tuahine terā tē huru ta’ahoa mai ra ’outou ia rātou.
« E taui [Iesu Mesia] i tō ’oe ’ā’au ’e tō ’oe orara’a. E tupu marū noa mai ’oe i te rahi ma te riro rahi atu ā mai iāna te huru. Nā te tū’atira’a ’e te fafaura’a iāna e ha’amatara rahi a’e i tōna mana nō ’oe » (Nō te pūai o te feiā ’āpī : E arata’i nō te rave i te mau mā’itira’a [2022], 8, reta tei fa’ahuru-’ē-hia).
E ’ere ānei i te hō’ē parau fafau rahi ? Noa atu te mea tā ’outou e tāfifi ra, i roto roa i tō tātou ’ā’au, e nehenehe tā Iesu Mesia e tauturu mai. Nāhea ’oe e fāriu ai i ni’a iāna i teie mahana ?
© 2025 nā Intellectual Reserve, Inc. Fatura’a pāruruhia. Nene’ihia i te fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Iritira’a nō Monthly For the Strength of Youth Message, February 2025. Tahitian. 19621 895