Nenengeni Kraist

Engon me fisu- ierin Kailey nupwen a emon chon emweir tori eu akseten a tori a angawa tupuwan. An asoso ren an we samau a okounoi seni sukun, me a poputa mefi an towaweno me anaemon. A weires ekiekin me ese sinei ian epwe kuna me ian aninis. emon chienan a ereni pwe epwe ausening ngeni ekkewe misineri. Ra aiti i usun ewe Achasefan an Jises Kraist. An kakaeo usun Kraist a ngeni an epinukunuk, me a mefi pwe Pusin Kot a anisi.

Kailey a ereni inan we, “Use mwo memefi pwe Kot amen tongei. Nge iei ua sinei pwe Amen tonge ei.“

Inan we, Michelle, a ekis mairu. I me punuwan we, Brock, ra suseni ewe Mwichefenin Jises Kraist ren Aramas mi Pin non Fansoun Soponon nupwen Kailey a fisu ierin pokiten ekkoch sokkun kapas eis, tipemwaramwar, me wewengaw. Ra ekieki pwe nour we epwe pwapwa me nukun ekkewe mwich me annuk. Rese mwo ekieki nge metewe re fori epwe atowawano Kailey seni ewe nefin ngeni Kot. Nupwen Michelle me Brock ra kuna usun an Kailey ekesiwin, ra mefi pwe a fansoun nakatam ar arapakan ngeni Kot, me ra mochen repwe mefi sefani ewe memef.

Ra churi nour we pisop, me mwirin ewe famini, pachenong mongeen Kailey we Braeden, ra niwiniti fan. Mefi ar arapakan ngeni Kot me poputasefani nefiner ngeni I—akaewin seni iotek—a eniwinsefanieto ar nuku. Niwinsefaniti mwichefen ese atawei ar kewe kapapas eis ika wewengaw, nge ra weweochuti pwe nupwe epwe wor pusin nefinen emon me emon ngeni Kot akon auchea nap seni nafangawen ar nuku.

Meinisin ekkei a poputa nupwen emon chienan—emon sarafo usum —a pesei Kailey an epwe nengeni Kraist. Me a fori!

Jises Kraist afen apasa, “Kutaei non ekiek meinisin; kosap tipemwaramwar kosap nuokus” (Doctrine and Covenants 6:36 Iei ewe pesepes seni ewe Itenapen Sarafo 2025. Mut ngeni kich sipwe chiechi fengen won ifa usun om kopwe fini nukunuk nap seni tipemwaramwar me nuku nap seni noninen nupwen ka nengeni Kraist:

Tamara W. Runia

Nupwen ua riaffou, amen chok soun anisi ei ai upwe ekieki usun Jises Kraist ren poun kewe mi onetau. Nupwen ua nengeni I, ua chemeni kapasen ewe kon, “ Upwe fiti Jises ne fetan“: “Ese tongeni epwe nikitieino, ina mwo nupwen ua turutiw.“

Emily Belle Freeman

Nupwen ua aneani itenapen ekkewe pukefel, a achemato usun Peter won ewe Setin Galilee. Anonga ekieki won ewe asepwan a anapano an nuokus me tipemwaramwar, a esenipangeni an mwotiw non noonon ewe asepwan. Nge anonga ekieki won ewe Chon Amanau a mut ngeni I an tufichin awesi met mine ese fori me akom: a fetan won konik! Amen amwarar, ewer. Met kopwe tongeni awesi nupwen ka nenengeni I?

Andrea Muñoz Spannaus

Nupwen ua poputa ne mefi nuokus, anongonong ika ia ua nom ia ika met mi fis, ua wesen ekieki usun nefinei ngeni Samach won Nang me Jises Kraist. Ua eniwini non ekieki fan fite: NGANG EMON NOUN KOT NENGIN. Ua sopweno ne fori ei tori ai ua mefi kinamwe. Amen chok anisiei!

Bradley R. Wilcox

Eisinuk ion akon ekiekuk me tongeok. Inom me somom me ekkewe souemwen? Ekkewe aramas won internet ren ion enip kopwe chok eu ekan nampa? Nengeni Samach won Nang me Kraist Ramen ekieki!

Steven J. Lund

Chechemeni met ka kaeo usun nupwen ka apasa ewe itenapen ewe mwichen Aaronik Pristut me ekkewe fopun: En emon noun Kot at me nengin mi unusen auchea. Nuku pwe Samach we mi wor an kokot fan itach. Nengeni Kraist wewen kuna pwe An we Achasefan ina popunapen an we kokot.

Michael T. Nelson

Anneani ekkewe pukefel sia nengeni Kraist! Tipemwaramwar me nuokus epwe chok pusin morono nupwen sia chechemeni usun ewe manaman me asukun usun Jises. Sia men unusen feioch sia tongeni kaeo An kapas. Ra fori non sokkun mettoch a fis ngeni kich non manauach.