Kitail Anahne Unsekla Ansouwet?

Kasansalakan sang Emily E. Jones

Pwuhk sarawihkan intingdier pwehn kapaida oh kangoangei kitail, oh ni mehlel irail wia mepwukat. Ahpw kumwail tehkadahr me ekei ansou mie ire kin pwarada me kin katamankin kitail me kitail kin dohsang Kauno? Me karasepe: “Eri mourimwail en unsekla, duwehte ieias unsek en Samamwail … me ketiket nanleng” (Madiu 5:48). Pwehki kosonned wet, kitail mentenoh pwurala wendi oh koduhpwaldi. Soangen koasoandi en selestial wet mwomwen me kitail sohte kak alehdi. Ahpw mehlel Kauno sohte kak ketkiheng kitail ehu kosonned me E ketin mwahngih me kitail sohte kakehng.

“Kohdo rehn Krais, oh unsekla reh,” Moroni pekipeki. “Poakehng Koht sang nan ngenomw unsek, lamalam oh kehl unsek, eri … sang sapwelime kupwur kalahngan ke kak unsekla rehn Krais” (Moroni 10:32; ire kesempwal kapatapatehng). Ihte atail koapwoaroapwoar en unsekla mehlel iei sang ni atail pahn alehda ni ah wia kisakis ieu sang nanleng—kitil sohte kak “kadoahkehda”.

Likin Sises, sohte wiewiahn aramas men me unsek nan seiloaken sampah wet, eri nan mourwet kitail nantiheng mwamwahula tengeteng oh dehr kasik pweida toutou ong pein kitail oh ong mehteikan.

Ma kitail nantihengete, eri wasahkis nan mour poatoapoat atail doadoahk en kamwahula pahn imwisekla oh kaselela—me ong nan Kadehde Kapw wehwehki unsekla.