Ko e ʻIloʻi ʻa e Palani Fakalangi ʻi Hoku Fāmilí: ʻEnitulia Makongikī

ʻOku kehe ʻaupito ʻa e tūkunga ʻo hoku fāmilí mei he meʻa naʻá ku fakakaukau ki aí. Naʻe mālōlō hoku husepānití hili pē ha taimi nounou ʻo ʻema malí pea naʻe pau leva ke u tauhi toko taha hoku fāmilí. Pea ʻoku ou ʻiloʻi ko e foʻi fakakaukau ko ʻeni “ʻoku kehe ia mei he meʻa naʻá ku fakakaukau ki aí” ʻoku ʻikai ke foʻou ia kiate au. ʻOku tokolahi ha niʻihi ʻoku nau fefaʻuhi mo e ongo ko iá, pea ʻe lava ke ne ʻomi ha loto-mamahi lahi. Ka ʻoku ʻi ai ha ngaahi meʻa kuó u ako. Kuo ʻi ai ha ngaahi faingamālie moʻoni ʻi he ngaahi founga ʻoku kehe mei he meʻa naʻá ku ʻamanaki ki aí ke fakatokangaʻi ʻa e toʻukupu ʻo e ʻOtuá ʻi hono poupouʻi au mo ʻomi kiate au ʻa e ivi malava ke fai ʻa e ngaahi meʻa ʻoku fiemaʻu ke u fai ʻa ia ʻoku mahuʻingá pea ʻoku ou loto ke fai lelei Maʻaná.

Kuo tokolahi ʻa e kakai kuo nau alanima mai ʻo tokoni pea mo ʻofa mo fakaaʻu mai ʻa e ʻofa ʻa e ʻOtuá kiate kimautolu ʻi he ngāue tokoni pea ʻi he angaʻofa pē naʻa mau fiemaʻú. Ka ko e taha ʻo e ngaahi meʻa mahuʻinga taha kuó u akó ko e hoko ko ia ko ha konga ʻo ha fāmili taʻengatá. Ko ha ʻofefine au ʻo e Tamai Hēvaní, pea kuó Ne foaki mai ha vā fetuʻutaki fuakava ʻa ia kapau te u tali lelei mo fai ʻa e meʻa kotoa te u lavá ke fakamālohia, te Ne ʻomi ʻa e meʻa kotoa pē ʻoku ou fiemaʻu ke tauhi ʻaki hoku fāmilí, ke hoko ko e faʻē lelei taha te u lavá, ke ʻofa ʻiate kinautolu ʻoku hoko ko ha konga ʻo hoku fāmilí, ko hoku kāingá, ko e fāmili ʻa e ʻOtuá. ʻI heʻeku fakamālohia ʻa e vā fetuʻutaki fuakava ko iá, ʻoku tokoni ia ke u ʻofa ʻo lahi ange ʻo hangē ko Iá. Pea ko e malava ko ia ke fakatokangaʻi ʻa e ʻofa ʻa e ʻOtuá ʻi heʻetau moʻuí ko ha meʻafoaki mālohi ʻaupito ia. Pea ʻi heʻeku fakatokangaʻi ʻa e lahi ʻo e ʻofa ʻa e Tamai Hēvaní ʻiate aú, ʻa e lahi ʻo ʻEne kātakiʻi aú, pea mo e lahi ʻo ʻEne finangalo ke u ofi kiate Iá, ʻoku hoko leva ʻa e ngaahi vā fetuʻutaki fakafāmili ko iá ʻo ʻuhingamālie mo loloto ange pea taau ke ngāueʻi.

Hangē pē ko ʻeku ongoʻi mohu tāpuekina ke maʻu ha ʻilo ki he ʻOtuá mo ʻEne ʻofa kiate aú, ʻoku pehē foki ʻeku ongoʻi houngaʻia ʻi heʻeku maʻu ʻEne ʻofá pea mo akoʻi ʻEne ʻofá ki he niʻihi kuo ʻomi ke u tauhí pea mo kinautolu ʻoku ou ʻofa aí. Ko e meʻa mahuʻinga taha ia te u loto ke ʻilo ʻe ha taha fekauʻaki mo aú ko ʻeku ʻofa ʻia Sīsū Kalaisí. ʻOku ou ʻiloʻi ʻoku ʻafioʻi au ʻe ha Tamai Hēvani ʻofa. ʻOkú Ne kau ʻi he ngaahi meʻa iiki ʻo ʻeku moʻuí. Pea ko e ʻuhinga ʻokú Ne finangalo ai ke u kau ʻi ha vā fetuʻutaki fuakava mo Iá pea mo fai ʻa e ngaahi fili ʻoku nau ʻai ke u hangē ko Kinauá, koeʻuhí he ʻokú Ne finangalo ke u ʻofa ʻo hangē ko Iá. Ko ha tāpuaki maʻongoʻonga ke lava ʻo fai ia pea mo fakatokangaʻi Hono toʻukupú ʻi he ʻofa ko iá.