Mauaina o le Mamanu Paia i Lo’u Aiga: Andrea McConkie

E foliga ese lo’u aiga nai lo le mea sa ou manatu o le a i ai. Na maliu lo’u toalua ao le’i leva ona ma faaipoipo ma o lea sa ou tausia ai lo’u aiga o se matua nofotoatasi. Ma ou te iloa o lenei manatu o le "e foliga ese mai nai lo le mea sa ou mafaufau i ai" e le tulaga ese ia te au. E toatele o loo feagai ma lena lagona, ma e mafai ona aumaia ai le tele o le lototiga. Ae e i ai nisi o mea ua ou aoaoina. Sa i ai ni avanoa moni i va po o eseesega e iloa ai le aao o le Atua i le lagolagoina o a’u ma tuuina mai ia te a’u le tomai e faia ai mea e tatau ona ou faia e taua ma ou te manao e faia lelei mo Ia.

E toatele naua i latou ua laa atu e faatumu ia pu ma alolofa ma tuuina mai le alofa o le Atua ia i tatou i le auaunaga ma i le, amiotonu, o le agalelei ua tatou manaomia. Ae o le mea moni ua ou aoaoina o le avea muamua ma se vaega o se aiga e faavavau. O au o se afafine o le Tama Faalelagi, ma ua Ia ofoina mai ia te au se sootaga faalefeagaiga afai ou te talia ma faia mea uma ou te mafaia e faamalosia ai, e tuuina mai e Ia ia te au mea uma ou te manaomia e tausi ai lo’u aiga, ia avea ma tina sili ona lelei e mafai ona ou avea ai, ia alofa atu ia i latou e avea o se vaega o lo’u lava aiga, lo’u aiga lautele, aiga o le Atua. Pe a ou faamalosia lena sootaga faalefeagaiga, o le mea na te faia o le fesoasoani ia te au e alofa atili ai e pei ona Ia faia. Ma o le mafai ona iloa o le alofa o le Atua i o tatou olaga o se meaalofa mamana—mamana tele. Ma pe a ou iloa le tele o le alofagia o au e se Tama Faalelagi, o Lona onosai ia te a’u, ma le tele o Lona finagalo ia ou latalata atu ia te Ia, o le a atili ai ona tamaoaiga ma loloto na sootaga faaleaiga ma alagatatau ai le faia o galuega.

E pei lava ona ou lagona le faamanuiaina tele i le i ai o se malamalama i le Atua ma Lona alofa mo a’u, ou te lagona foi le lotofaafetai ona ua ou maua ma aoao atu Lona alofa ia i latou o e ua tuuina mai ia te au ma i latou ou te alofa i ai. O le mea aupito taua lena ou te manao ia iloa e se tagata e uiga ia te a’u o le, ou te alofa ia Iesu Keriso. Ou te iloa e silafia a’u e se Tama Faalelagi alofa. O loo aofia o Ia i auiliiliga o lo’u olaga. Ma o le mafuaaga e finagalo ai o Ia ia ou i ai i se sootaga faalefeagaiga ma Ia ma faia filifiliga e avea ai au e pei o i La’ua, ona e finagalo o Ia ou te alofa e pei ona Ia faia. O se faamanuiaga sili le mafai ona faia o lena mea ma iloa Lona aao i lena alofa.