Pagdiskobre sa Balaanong Disenyo diha sa Akong Pamilya: Andrea McConkie

Ang akong pamilya morag lahi kaayo kaysa sa akong gihunahuna kon unsa kini. Namatay ang akong bana wala madugay human mi maminyo ug mao nga nag-inusara kong miatiman sa akong pamilya. Ug nasayod ko nga kini nga ideya nga “morag lahi ra kaayo kaysa akong gihunahuna” dili talagsaon nganhi kanako. Adunay daghan nga nakigbisog niana nga pagbati, ug kini moresulta sa grabe nga kasagmuyo. Apan adunay pipila ka butang nga akong nakat-onan. Adunay tinuod nga mga oportunidad diha sa mga dapit o mga pamaagi aron maila ang kamot sa Dios sa pagpalig-on kanako ug sa paghatag kanako og abilidad sa pagbuhat sa mga butang nga kinahanglan nakong buhaton nga importante ug nga gusto nakong buhaton og maayo para Niya.

Daghan kaayo ang mitabang aron pun-an ang unsay kulang ug sa paghigugma ug sa pagpaabot sa gugma sa Dios kanamo diha sa pagserbisyo ug, pinaagi lang, sa pagkamabination nga among gikinahanglan. Apan ang ako gayod nga nakat-onan mao kanang pagkahimong kabahin sa usa ka mahangtorong pamilya. Ako anak nga babaye sa Langitnong Amahan, ug Siya nagtanyag kanako og relasyon sa pakigsaad nga kon akong hangopon ug buhaton ang tanan nga akong mahimo aron mapalig-on, Siya mohatag kanako sa tanan nga akong gikinahanglan aron mabuhi ang akong pamilya, nga mahimong labing maayo nga inahan, sa paghigugma niadtong nahimong kabahin sa akong kaugalingong pamilya, akong mas dako nga pamilya, ang pamilya sa Dios. Kon akong palig-onon kana nga relasyon sa pakigsaad, makatabang kini kanako mga mas mohigugma sama sa Iyang gibuhat. Ug ang pagkaila sa gugma sa Dios diha sa atong kinabuhi usa ka gamhanan kaayo—usa kini ka gamhanan nga gasa. Ug kon akong mahibaloan kon unsa ka dako ang gugma sa Langitnong Amahan kanako, kon unsa Siya ka mapailobon nako, ug kon unsa kadako ang Iyang gusto nga mapaduol ko Kaniya, kini makapahimo niadto nga mga relasyon sa pamilya nga mas makahuloganon ug angay nga buhaton.

Sama nga gibati nako nga dako kaayo akong panalangin nga adunay kahibalo sa Dios ug sa Iyang gugma alang kanako, mapasalamaton usab ko nga makabaton ug makatudlo sa Iyang gugma niadtong gitugyan kanako ug niadtong akong gihigugma. Kana ang labing mahinungdanong butang nga gusto nakong mahibaloan sa usa ka tawo mahitungod kanako mao nga akong gihigugma si Jesukristo. Nasayod ko nga ang usa ka mahigugmaong Langitnong Amahan nakaila kanako. Siya adunay kalabotan sa mga detalye sa akong kinabuhi. Ug ang rason nga gusto Niya nga ako maanaa sa usa ka relasyon sa pakigsaad uban Kaniya ug mohimo og mga pagpili nga makapahimo nako nga sama Kanila, tungod kay gusto Niya nga ako mohigugma sama sa Iyang gibuhat. Dako kaayo nga panalangin nga mabuhat kana ug makaila sa Iyang tabang niana nga gugma.