Kei Faivelenga ʻi he Fehangahangai mo e Fakaʻitaʻí, Mamahí, pe ʻAhiʻahí: ʻEma Mātini

Kuó u ako ʻi heʻeku moʻuí ke tuku ke tataki au ʻe he ʻEikí, ke Ne ʻaʻeva mo au, ke Ne fakahinohinoʻi au. Tautautefito ki he ngaahi taimi faingataʻá, ke Ne hoko ko hoku taula, ko hoku mālohinga. ʻOku ʻikai faingofua maʻu pē ia. Ko e taimi ʻe niʻihi ʻoku loto hotau lotó ke kei fefeka pē. ʻOku tau ongoʻi ʻoku fakatonuhiaʻi kitautolu ʻi he taimi kuo fakamamahiʻi ai kitautolú. Ka ko e founga lelei taha ke laka ai ki muʻá ko hono tuku faivelenga pē ke Ne ʻofa ʻiate kitautolu.

ʻOku ou fakakaukau ki ha taimi, ʻi heʻeku kei fua fatongia ʻi he Siasí, naʻá ku faifeinga ke fai hoku lelei tahá, ka naʻe ʻikai tali lelei ia. Pea naʻe ʻikai ngata pē ʻi hono taʻetali lelei aú, ka naʻe—ne u aʻusia ha ngaahi fakamaau taʻetotonu mo ha ngaohikovia lahi ʻo aʻu ki ha tuʻunga naʻá ne ʻai ke u fakakaukau, “Te u kei fua fatongia pē nai? Ko ha ʻātakai mo ha feituʻu nai ʻeni maʻaku?” Naʻá ku ongoʻi moʻoni ʻo hangē naʻá ku ʻi ha tuʻunga ʻoku ou mafasia fakalaumālie aí, pea naʻe ʻi ai haʻaku fili ke fai. Te u tuku nai ki he ʻEikí ke Ne ʻofa ʻiate au, pe te u fekumi nai ki ha ngaahi maʻuʻanga tokoni kehe ke ne fakafiemālieʻi au?

Pea ʻi heʻeku fakakaukau ki aí, naʻá ku fakatokangaʻi naʻá ku fiemaʻu mo fakaʻamua lahi ange ʻa e ʻEikí ʻi heʻeku moʻuí mo ʻEne ngaahi tāpuakí ʻo laka ange ʻi ha toe meʻa. Naʻá ku fiemaʻu ʻa e tāpuaki ʻo e sākalamēniti fakauiké pea mo ʻene fakaivia hoku laumālié. Ko e malava ke hū ki he temipalé mo e ngaahi fuakava ʻi aí. Pea ʻi heʻeku tauhi ia ko e meʻa ke u tokanga taha ki aí, naʻá ne tokoniʻi au ke u fakamolemoleʻi. Naʻe tokoni ia ke u sio ʻo fakalaka atu ʻi he ngaahi tōnounou ʻo e ngaohikoviá kae fakatokangaʻi naʻá ku ʻi hení koeʻuhí ko ha taumuʻa mahuʻinga ange. Naʻá ku ʻi hení ke maʻu e ngaahi tāpuakí pea ke u hoko ko ha tāpuaki ki he niʻihi kehé. Ke ʻoua naʻa tuku ʻeni ke hoko ko ha maka tūkiaʻanga ka ko ha faingamālie ke fakalakalaka ʻi heʻeku tuí. Pea ʻi heʻeku lotu mo falala ki he ʻEikí, naʻá ku maʻu ha mālohi ke siʻaki—ke siʻaki ʻa e mamahí, ke ʻoua naʻá ku pukepuke pe tukulotoʻi ʻa e taaufehiʻa naʻá ne feinga ke uesia-kovi hoku laumālié—kae tuku ke tokoniʻi au ʻe he ʻEikí mo ʻomi ha mālohi ke u laka faivelenga atu ki muʻa.

Ngaahi tokoua, ʻoku ʻiloʻi kimoutolu. ʻOku ʻafioʻi ʻe he ʻEikí, pea ʻokú Ne tokanga mai kiate kimoutolu. ʻOkú Ne ʻafioʻi ho hingoá, ʻokú Ne ʻafioʻi ho loto-mamahí, ʻokú Ne ʻafioʻi hoʻo fiefiá, pea ʻokú Ne finangalo ke ʻofa ʻiate koe. ʻOkú Ne finangalo ke ke fakaʻatā ho lotó kiate Ia. ʻOkú Ne ʻafioʻi ʻa e ngaahi kavenga ʻokú ke fuesiá. ʻOkú Ne ʻofa ʻiate koe mo finangalo ke ke ongoʻi ʻa e ʻofa ko iá meiate Ia. Ko ha kaungāʻapi, ko ha fefine, ko ha kaungāmeʻa ʻokú ne foaki atu ʻa e tāpuaki ʻo e tokoni mo e poupou ko iá. Tuku ke nau tokoniʻi koe. Tuku ke nau takatakaiʻi koe ʻi he nima ʻo ʻenau ʻofá ʻo fakafou ʻi heʻenau ngāue tokoní.