Magpabilin nga Mapasaligon Bisan og Nag-atubang og Kahiubos, Kasakit, o mga Pagsulay: Eme Martin

Akong nakat-onan sa akong mubo nga kinabuhi nga tugotan ang Ginoo nga mangulo kanako, molakaw tupad kanako, tugotan Siya nga mogiya kanako. Labi na kon ang mga panahon lisod kaayo, nga himoon Siya nga akong angkla, akong kalig-on. Kini dili sayon kanunay. Usahay ang atong kasingkasing gusto nga magpabiling gahi. Bation nato nga makataronganon kini kon kita nasakitan. Apan ang labing maayo nga paagi aron makapadayon sa unahan mao ang matinud-anong pagtugot Niya nga higugmaon kita.

Naghunahuna ko sa panahon diin, sa pagserbisyo sa Dios ug sa Simbahan, naningkamot ko nga mahimong labing maayo, apan kadto wala kaayo dawata. Ug dili lang nga kadto wala kaayo dawata, apan—ako nakasinati og daghan nga sayop nga pagpanghusga ug pagmaltrato hangtod sa punto nga kini gayod nakapahimo nako nga maghunahuna og, “Mopadayon pa ba ko sa pagserbisyo? Kini ba usa ka luna ug dapit alang nako?” Gibati gayod nako nga mora og nabug-atan ko pag-ayo, ug kinahanglan na nga mohimo ko og desisyon. Ako bang tugotan ang Ginoo nga mohigugma nako, o mangita ba ko og kahupayan sa ubang mga tinubdan?

Ug sa paghinuktok, nakaamgo ko nga gikinahanglan ug gusto nako ang Ginoo sa akong kinabuhi ug ang Iyang kauban nga mga panalangin nga labaw pa kay sa dili. Nga gusto nako ang panalangin sa sinemana nga sakramento ug ang pagpuno niini alang sa akong kalag. Ang makahimo sa pag-akses sa templo ug sa mga pakigsaad didto. Ug busa, samtang kana maoy akong gitutokan, nakatabang kini nako nga makapasaylo. Kini nakatabang nako nga dili motan-aw sa mga pagkadili hingpit ug mga pagmaltrato ug makaila nga ako ania dinhi alang sa mas dako nga katuyoan. Nga ako ania dinhi aron makadawat og mga panalangin ug hinaot pa nga mahimong panalangin sa uban. Nga kini dili tugotan nga mahimong babag kondili usa ka tumbanan sa akong pagtuo. Ug mao nga samtang ako nag-ampo ug misalig sa Ginoo, nakakaplag ko og kalig-on nga mobuhi—mobuhi sa mga kasakit, nga dili magbaton o maghambin sa kasilag nga misulay sa paghasol sa akong espiritu—kondili tugotan ang Ginoo nga mohupay ug mohatag nako sa kalig-on nga matinud-anong mopadayon sa unahan.

Mga sister, kamo nailhan. Ang Ginoo nakahibalo, ug Siya nag-atiman kaninyo. Siya nakaila sa inyong ngalan, Siya nakahibalo sa inyong mga kasakit, Siya nakahibalo sa inyong mga kalipay, ug gusto Niya nga mohigugma kaninyo. Gusto Niya nga inyo Siya nga pasudlon. Siya nakahibalo sa mga palas-anon nga inyong gidala. Siya nahigugma kaninyo ug gusto nga mabati ninyo kana nga gugma gikan Niya. Kini usa ka silingan, kini usa ka sister, kini usa ka higala nga magtanyag sa panalangin niana nga paghupay ug niana nga suporta. Pasudla sila. Tugoti sila nga mogakos ninyo sa mga bukton sa ilang gugma pinaagi sa ilang pagserbisyo.