Te Motinnano ae Teimatoa Ngkana ko Kaitara ma te Bukinaki, Kammarakaki, ke Taian kataaki: Elaine Thornton

N tabetai ti tangiriia ara taan kairiiri bwa a na kaota te kororaoi ibukira, ao n tabetai ti tangira te kororaoi bon mai iroura. Anne te bwai ae matoatoa te titiraki i aona ngkana e kaitara nakon ana babaire te euangkerio. Ao I taku bwa e rang kakawaki uringakin ae te kaantaninga bon te rikirake ao te mataata ao te tangira i marenaia n tatabemaniia nako.

N aron te katooto, n te taina ao e riki au kangaanga ae matoatoa ma temanna te tia kairiiri are e a tia ni katabuaki, ao e a tia n riki bwa te kangaanga ae korakora irouia ara utu. Ao I tei n iango ao n taraai ao n iango, “E a tia ni karaoa te mwakuri ae rang kammaraki. Ma tao I a tia naba ngai ni kammarakiia aomata. Tao I a tia ni karaoa anne ao I kainnanoa te nanoanga.” Ngaia ae I riai n oki rikaaki nakon te bwai ae I ataia. Ao e rangi ni kakawaki bwa ti na uringa te bwai ae ti ataia. Ngke arona bwa e aki riki anne, N na bon aki oki rikaaki nakon are bon aau. Ngke arona bwa e aki riki anne, N na bon aki rairaki nakon te Uea n te kawai ae nano ma n uaana. Ngaia ae I teimatoa n rikirake n te kawai anne ni kinaa Tamau are i Karawa, ae au Tia Kamaiu. Ao tera raoi bukina ngkai I rang n tangiria ni kan Kinaa? I bon rangi n tangiria ni Kinaa bwa I aong n riki n ai Arona.

Ngkana kam uaia ni bootaki n te Bootaki n Aine ao ngkana kam bootaki n reirei, I kaoi ngkami bwa kam na ira buakona. Kabanea nanom nakon temanna ae e aki iango n arom ke nakoia aika iai aia kangaanga ma aia koaua. Temanna ae e a tibwa raure ma buuna. Temanna ae aki koaua ngkana a materaoi bwaai ni kabane. Ao tera aron ae ti kabanea nanora nako iai? I taku bwa ti na bongana nakon te Tia Kamaiu ngkana ti reiakina—aron karaoan te bwai ae E ataa aron karaoana. Ao ngkana ti kona ngaira aine ni karekea iroura te aeka n nanoanga ao te katiteuanaaki ae raoiroi aei, ataakina ae ti bane ni iai ara kangaanga aika ti rootaki iai. Ao tao ngkana ti kaai n mwakuri ao ni karikia bwa te tabo ae mano, ti kona n tibwauai tabeua ara kangaanga ake ti na bon aki karekei bwa e aonga n kunea te aine ae iai naba ara kangaanga. Ao ti na bane ni marooro ao ni bita te katei ni babaka ni kororaoi ao ni bon buokiira i marenara bwa ti aonga n rikirake. I tangiria ngkana iai ae kona n tibwatibwa ma ngai, ibukina bwa imwina I kona n nakoia ao ni kangai, “O, ko kanga n rinanon aei? Ko kanga n rinanon te aekaki aei? Ko rabwa ibukin am tibwatibwa.” Ao e riki bwa te bobotaki n aine ae tamaroa aika a tatangira ao a kinaa Tamaia are i Karawa.