Karekean Totokoan Kangaanga n te Namakin: Carolee Scowcroft

Ai aron ae I namakinna bwa I kaaniaki ma au bakatibu. A tia aia karaki n riinga nanou. Iai tibutoruu te mwaane are e kuri ni bwaka taningana man bwakana man te aenika. Ao tinana, e bon bae, n tebokia ao n manga kaokia ao n kabaea n nangoia. Ma ana onimaki, e tamaroa man okira arona ni boou te taninga anne. Ao I tabe n iangoa aron ana onimaki ao ana tataro, ibukin natina.

Ao I a manga iangoa taekan tibu te unaine are e tiku n akea buuna n te tai ni Karawawata ma aman natina, ao arona n kakaea angana n boutokaia natina. Bon akea temanna ae anga te mwane nakoina, ma e riki bwa te tia karikirake ae bane arona ao ni karaoi bwaai aika a kamiimi. Ma ngaia are, I namakinna bwa a tia ni buokai au bakatibu aikai n kateiraoa maiu−a tia ni buoka kateiraoan maiu are I kakaaitau ibukin kakabwaia ake a reke irou.

Ao n aroia aomata tabeman, n ai aromi, I a tia n kaitarai kakaewenako n au iango. Ao I a tia n reiakinna bwa kakaewenako−n ai aron ae Iesu bon te kawai−kakaewenako bon te babaire. Ao ngkana ti kinai nakon ae ti na un iai, reiakina te kukurei iai ao kakaaitau ibukin kakaewenako akanne, ao ti na rangi ni kukurei riki. Ti na kona n reiakina buokaia tabeman ngkana a rinanon kakaewenako.

Anne te bwai teuana ae I a tia n reiakinna ae ti bon kakarekei kakaewenako. Ao tao e kona n reke te kakaewenako iroum ao ko reiakinaki mai iai, ao anne e anganiko arom n buokiia tabeman riki ngkana a rinanon te kakaewenako ae ai aron anne ke ae kaokoro ma te bwai ae e korakora riki iai otam.

Iai irou ai koaua bwa a na bon taobaraaki kakaewenako ni kabane ake ti kaitarai mairoun ara Tia Kamaiu. Bwa tao ke tiaki te namakin ae kaineti ke rinanon temanna mai irouia ake E mwiokoia−temanna mairouia tarira n te Bootaki n Aine ke te nati te mwaane ke te aine, temanna ae kaan ma ngkoe are e roko ao n minitita nakoim n te aro ae buokiko n are ko rinanona.