Pag-ugmad og Emosyonal nga Kalig-on: Mitzi Semo

Dihang batan-on pa ko nga inahan, ang among kamagulangang anak nga lalaki usa pa ka tuig, nakadawat ko og tawag gikan sa gitrabahoan sa akong bana samtang naa ko sa trabaho. Ug miingon sila, “Ang imong bana naaksidente. Kinahanglan ka namo nga moadto sa ospital karon dayon.” Ug akong nahinumdoman nga misakay sa sakyanan ug gipaandar kini apan nakamatikod nga nagkurog-kurog ko pag-ayo. Mas grabe ang akong kabalaka kaysa akong gihunahuna. Ug naglingkod ko didto, ug kinahanglan gyod ko nga mag-ampo. Dayon gibati nako kining kusog kaayo nga pagbati sa kalinaw ug kainit, ug nasayod ko nga ma-okey ra ang tanan. Busa, pag-abot nako sa ospital ug ang doktor misulti nako, “Wa mi masayod kon makaya ba ni sa imong bana.” Akong nahinumdoman ang pagbati kadtong naa ko sa sakyanan, ug daw ang Ginoo nagsulti kanako, “Ayaw kabalaka, mamaayo ra ang imong bana sama kaniadto,” pero nasayod gihapon ko nga ma-okey ra ko ug mahimong okey ra mi bisan unsa pay mahitabo.

Ug sa dihang maghunahuna ko nga mahimong lig-on sa emosyonal nga paagi, makahunahuna ko sa kalinaw nga mahatag sa Manluluwas ninyo ug tabangan kamo nga mobati niini. Bisan unsa pa ang mahitabo ug bisan unsa pa ang sitwasyon nga anaa, nasayod kamo nga anaa Siya ug motabang Siya ninyo niining tanan. Ug mao kana ang akong gibati sa tibuok niadto nga pagsulay. Ug dili kadto sayon. Nakasinati kami og tuig nga daghang kalisdanan, sa pisikal ug espirituhanong paagi, apan amo kadtong nabuntog ug daghan ang among nakat-onan.

Usab, mosulti ko nga dili kitang tanan, makasinati og sama nga mga kasinatian sa kinabuhi. Apan nasayod ko nga alang nako, nianang panahona, kinahanglan kong modangop sa Ginoo ug magbaton og relasyon ngadto Kaniya. Ug sa pagbuhat sa ingon, gibati nako nga murag makaya ra gyod kini nako. Ug dayon ang akong emosyonal nga kalig-on natukod diha sa pundasyon sa ebanghelyo ug sa pundasyon ni Jesukristo. Mao nga, sa bisan unang panahon sa umaabot kon dunay mahitabo, ako kanang hinumdoman.

Ug gusto usab kong mosulti nga kada Dominggo kon moambit ko sa sakramento, dihang moingon kini sa paghinumdom sa Manluluwas, akong mahinumdoman ang akong mga kasinatian uban Kaniya. Ug kana usab nag-ugmad sa akong emosyonal nga kalig-on, tungod kay kana nga panumdoman nakatabang nako nga masabtan kinsa ako isip anak sa Dios ug nga ako adunay katuyoan dinhi ug nga ako anaa dinhi aron motabang Niya nga matukod ang Iyang gingharian. Ug busa, bisan unsa pa ka maayo o ka lisod ang mahimong dangatan sa atong umaabot, nasayod gyod ko nga anaa ug kanunay kong modangop sa Manluluwas. Ug aduna koy pagsalig niana nga relasyon, ug nga diha naggikan ang akong emosyonal nga kalig-on.