Pagdumala sa Naglumba nga mga Prayoridad: Garna Mejia

Seguro alang nako kon moingon ko nga, “Unsa ang usa ka butang nga nakatabang nako nga makalahutay sa lisod kaayo nga panahon o nakadumala sa mora og tinud-anay gayod nga naglumba nga mga prayoridad?” Kini mao ang konsepto sa “hinumdomi, hinumdomi.” Ngano man nga kanunay kaayo na isulti sa Langitnong Amahan kanato? Kini ba tungod kay tingali kita adunay purohan sa pagkalimot? Kini ba tungod kay basin makasinati kamo niining nindot nga milagro ug dayon, kahibalo na mo, mopadayon mo pagsubay sa inyong dalan sa kinabuhi, ug dayon adunay lain na usab nga hagit, ug lisod gayod kaayo nga mosalig nga ma-okey ra kini, nga basin masulbad ra dayon ang problema? Tingali ang Langitnong Amahan naghangyo kanato nga mahinumdom tungod kay Siya naglaom nga kita makakat-on aron mosalig Kaniya. Kon kita makasalig Kaniya, nan bisan unsa pa man ang mahitabo nato, ato kining mabuntog—ug makalahutay kita niini uban sa kalipay, ug kalig-on. Kahibalo mo, Siya wala magbutang nato sa kalibotan aron mahimong makaluluoy, di ba. Bisan kon ang dili maayo nga mga butang mahitabo kanato, dili kana mao kon kinsa kita.

Kon ako maghunahuna sa mga prayoridad, ako maghunahuna gayod pinaagi sa proseso sa pagmugna. Kahibalo mo, ang pagdeterminar kon sa unsang paagi gusto ninyong gamiton ang inyong panahon, unsay gusto ninyo nga puhunan sa inyong panahon, mao gayod ang pagdesisyon kon unsay gusto ninyong mugnaon. Unsa nga klase sa kinabuhi ang gusto ninyong mugnaon alang sa inyong kaugalingon? Nahibaloan nako nga kon akong himoon ang Dios nga akong prayoridad ug mosalig nga Siya motabang nako nga makamugna og maanindot nga kinabuhi, nan ang tanang butang sa kinabuhi mapahimutang sa saktong dapit. Tungod kay ako nasayod nga kadtong tanang butang mosunod ra sa akong tinguha nga moserbisyo sa Ginoo ug mohigugma Niya ug mopakita Niya nga ako nahigugma Niya.

Kon ako maghunahuna mahitungod kon giunsa nako pagpuyo ang akong kinabuhi, dili ko maghunahuna mahitungod sa unsa ang akong propesyon. Naningkamot ko sa paghunahuna kon kinsa ang kinahanglan nako nga mamahimo, ug kana ang mahimo nakong giya. Kana ang naggiya sa akong paggamit sa panahon ug mga prayoridad nga mao ang gugma alang ni Kristo, ug gugma alang sa atong Langitnong Amahan. Ug seguro adunay usa pa gayod ka importante nga bahin. Kon kita suod sa Espiritu, Siya mogiya kanato sa atong panaw sa kinabuhi. Siya motabang ninyo nga mobalhin og direksyon sa saktong panahon. Siya motabang ninyo nga mohimo og mga desisyon nga adunay mahangtoron nga mga sangpotanan—sama sa kaminyoon, pamilya, pagsuporta niadtong inyong gihigugma, pagserbisyo niadtong inyong gihigugma—aron nga ang tutokan dili lang kamo kanunay o kon unsay inyong gibuhat, kondili si kinsa kamo mamahimo.