Manejem Ol Samting we I Moa Impoten: Garna Mejia

Long mi, sapos mi talem se, “?Wanem wan samting we i bin helpem mi blong go tru wan hadtaem o blong manejem wanem we mi ting se i moa impoten long laef blong mi?” Hem i aedia ia blong “tingbaot, tingbaot.” ?From wanem Papa long Heven i talem hemia long yumi plante taem? ?Hem i from se i nomol blong yumi stap fogetem samting? ?Hem i from se maet yu eksperiensem naesfala merikel ia mo afta, yu save, yu gobak long nomol laef blong yu, mo afta, i gat wan nara jalenj, mo i had tumas blong gat tras se bae evri samting i kambak oraet, mo ating bae hemwan i kam gud bakegen? Mi ting se Papa long Heven i stap askem yumi blong tingbaot, from se, Hem i stap hop se bae yumi lanem blong trastem Hem. Sapos yumi trastem Hem, afta, wanem we bae i kam long rod blong yumi, bae yumi save go tru long hem—bae yumi save winim wetem glad, mo gat paoa blong kontrolem filing blong yumi. Yu save, Hem i no putum yumi long wol ia blong stap harem nogud. Iven sapos ol nogud samting oli hapen long yumi, hemia i no huia yumi.

Taem mi tingting long ol samting we i kam faswan long laef, mi tingting long wanem i plan blong mi. Yu save, blong tingting long hao yu wantem yusum taem blong yu, wanem yu wantem kasem olsem wan risal blong taem we yu givim, hem i moa abaot stap jusum wanem yu wantem krietem. ?Wanem kaen laef yu wantem blong krietem blong yuwan? Mi faenemaot se, taem mi putum God i kam faswan mo trastem se Hem bae i helpem mi krietem wan naesfala laef, afta, ol samting bae oli hapen olsem we mi wantem. From se, mi save se evri samting ia oli folem tingting blong hat blong mi we i blong wok blong God, blong lavem Hem mo soem long Hem se mi lavem Hem.

Taem mi tingbaot hao mi stap laef, mi no tingbaot karia o wok blong mi. Mi traem blong tingting long huia mi nid blong kam olsem mo hemia nao prinsipol we i stap lidim mi. Hemia nao wanem we i lidim mi blong yusum taem mo blong lavem Kraes mo Papa blong yumi long Heven i kam faswan. Mo mi ting se i gat wan impoten pat tu. Sapos yumi stap klosap long Spirit, Hem bae i lidim yumi long rod blong laef blong yumi. Hem bae i helpem yu blong tanem yu long stret taem. Bae Hem i helpem yu blong mekem ol desisen we oli givim laef we i no save finis—olsem mared, famli, sapotem olgeta we yu lavem, mo givim seves long olgeta—mekem se, fokas, oltaem bae hem i no long yu o wanem yu stap mekem, be hem i abaot huia yu stap kam.