Ko hono Maʻu ha Mālohi mo e Fiemālie ʻia Sīsū Kalaisí: Teina ʻEili

ʻI he ngaahi taʻu kuohilí, naʻá ku kamata hiki ha ngaahi talanoa mei heʻeku moʻuí, mei he taimi ne u ongoʻi ai ʻa e Laumālié pe ko e ivi tākiekina ʻo e Fakamoʻuí ʻi heʻeku moʻuí pe ongoʻi ʻEne fakafiemālié ʻi ha taimi naʻá ku fiemaʻu ai Iá. Naʻe kamata ke u hiki e ngaahi talanoa ko ʻení koeʻuhí naʻá ku fie fakahoko ia ki heʻeku fānaú. Ka ko e meʻa naʻe hoko ʻi heʻeku fakahoko ʻení ne kamata ke u mamata ki he toʻukupu ʻo e ʻOtuá ʻi heʻeku moʻuí. Naʻe kamata ke u fakatokangaʻi ʻi heʻeku hiki ʻa e ngaahi aʻusia ko ʻení kuo tokoniʻi au ʻe he ʻOtuá, kuó u mamata ki Hono toʻukupú, kuó u maʻu e ngaahi aʻusia fakaʻofoʻofá ni, pea ʻoku ʻi ai ʻeku fakamoʻoni kuó Ne tokanga mai kiate au pea kuó u ʻiloʻi naʻá Ne ʻi ai. Pea naʻá ku fakakaukau naʻe hoko ia ko ha fanga kiʻi meʻaʻofa ne u lava ʻo fakakaukauloto ʻoku ou faʻo ʻi hoku kató, peá u toʻotoʻo holo pē. Pea ʻi he taimi ne u faingataʻaʻia ai he ʻahó pe māhiná, ne u lava ʻo toʻo hake e aʻusia ko iá ʻo pehē, "ʻOku ou ʻilo. Koeʻuhí naʻe moʻoni e aʻusia ko iá, pea ʻoku ʻikai ke u veiveiua he naʻá ku aʻusia e meʻa ko iá. Pea ʻoku ou maʻu ia, pea ʻoku ʻaʻaku ia."

ʻOku ou tui, ʻoku ou ʻilo, ʻoku ou fakapapauʻi ʻoku finangalo ʻa e Tamai Hēvaní ke tau maʻu ha ngaahi aʻusia mo Ia. ʻOku ou tui ko e ʻuhinga ia ʻoku tau maʻu ai ʻa e folofolá—ke tau maʻu ha ngaahi aʻusia mo Ia. ʻOku ou ako mei heʻeku mamata ki ha meʻá, ʻoku ou toʻotoʻo holo pē ʻeku kiʻi kato aʻusiá. Pea te u lava ʻo toʻo takitaha hake ia ʻi he taimi ʻoku ou fiemaʻu ai kinautolú. Pea naʻe tokoni hono hiki kinautolú ke u lava ʻo manatuʻi kinautolu. Pea ko e taimi pē ne u fiemaʻu ai kinautolú, naʻe maʻu ia.

Ko e ʻuhinga ʻoku ou fiemaʻu mo tauhi ai e ngaahi talanoa ko ʻení, ko ha fakamoʻoni ia ʻo e meʻa kuó u aʻusiá ki heʻeku fānaú mo hoku hakó ka ke fakamoʻoniʻi foki ki heʻeku Tamai Hēvaní naʻá ku mamata kiate Ia, naʻá ku mamata pea ʻiloʻi. ʻOku ou ongoʻi ʻoku hangē ha niʻihi ia ha ʻuma ʻi he laʻé. Naʻá ku ongoʻi ia, peá u ʻiloʻi. Pea ʻoku ou fie fakahaaʻi ia. Pea ʻoku ou hokohoko atu hono tohi kinautolú ke u lava ʻo fakamoʻoniʻi naʻá ku mamata ki ai pe ongoʻi ia.