Faenem Paoa mo Help We I Kam long Jisas Kraes: Dana Earl

Sam yia i pas, mi stat raetemdaon ol stori blong laef blong mi, stat long taem we mi bin filim Spirit o filim paoa blong Sevya long laef blong mi o filim help we i kam long Hem long wan taem we mi nidim blong filim Hem. Mo mi stat blong raetemdaon ol stori ia from mi wantem blong givim olgeta i go long ol pikinini blong mi. Be wanem we i hapen long taem blong mekem hemia i we mi stat blong luk han blong God long laef blong mi. Mi stat blong luk tru long fasin blong raetemdaon ol eksperiens ia se God i bin stap ia blong mi, se mi bin luk han blong Hem, mo mi bin gat ol naesfala eksperiens ia, mo se mi gat pruf se hem i bin kea long mi mo se mi bin save se Hem i bin stap ia. Mo mi stat blong luksave se oli kam ol smol presen we mi save luk we mi putum long paket blong mi mo mi save tekem wetem mi oltaem. Mo taem mi gat wan nogud dei o manis, mi save tekemaot eksperiens ia mo talem, “mi save. From se eksperiens ia we mi bin gat hem i tru, mo mi nogat tu tingting from mi bin gat eksperiens ia. Mo mi mi gat, mo hem i blong mi.”

Mo mi ting se mi save, mi trastem se Papa long Heven i wantem yumi blong gat ol eksperiens wetem Hem. Mi bilivim se from hemia nao yumi gat ol skripja—i blong yumi gat ol eksperiens wetem Hem. Mo yes, mi mi wan man blong luksave samting, mekem se mi karem wetem mi smol paket blong ol eksperiens blong mi. Mo wanwan mo evriwan long olgeta, mi save karemaot taem mi nidim olgeta. Mo blong raetemdaon olgeta i helpem mi blong mi save tingbaot olgeta. Mo enitaem we mi nidim olgeta, oli stap ia wetem mi.

Risen we mi wantem blong raetem ol stori ia mo kipim olgeta i blong miwan olsem wan testemoni blong wanem mi bin gat eksperiens long hem mo blong ol pikinini blong mi mo ol jeneresen blong mi, mo tu blong testifae long Papa blong mi long Heven se mi luk Hem, se mi bin luk mo mi save. Mi filim olsem se sam long olgeta i olsem wan kis long fored blong hed. Hemia mi filim, hemia mi save. Mo mi wantem blong talem tangkyu from hemia. Mo mi gohed blong raetemdaon olgeta bong mekem se mi save luksave se mi bin luk o filim hemia.