Bakit Mahalaga ang Ligtas na Inuming Tubig sa Pagpapanatili ng Magandang Kalusugan

Nangako si Jesucristo, “Sinumang umiinom ng tubig na aking ibibigay ay hindi na mauuhaw magpakailanman” (Juan 4:14). Ang tubig na inaalok ni Cristo ay ang Kanyang mga turo, na maaari tayong palakasin sa espirituwal at ihanda para sa buhay na walang hanggan. Gayundin, mahalaga ang tubig sa ating pisikal na kapakanan at mahalaga ito sa pagpapalakas ng pisikal na buhay. Ang ligtas na inuming tubig ay pinananatiling malusog ang ating katawan at tinutulungan itong gumana nang maayos.

Bakit mahalaga ang ligtas na inuming tubig sa magandang kalusugan?

Kailangan ng ating katawan ng tubig para sa lahat ng ginagawa natin. Dahil dito, mahalagang uminom tayo ng maraming inumin, lalo na kapag mataas ang mga temperatura. Dapat tayong makaubos ng hindi bababa sa dalawang litro ng tubig bawat araw kapag maaari. Gayunman, hindi lahat ng tubig ay ligtas inumin. Ang maruming tubig ay maaaring magdulot ng sakit.

Mga sintomas ng sakit na dulot ng bakterya sa tubig:

• Pagtatae
• Dehydration o Kakulangan ng Tubig sa Katawan
• Sakit ng tiyan

Karaniwang mga sakit mula sa tubig:

• Typhoid fever
• Kolera
• Giardia
• Dysentery
• E Coli
• Hepatitis A
• Salmonella

Kapag hindi nagamot, maaaring maging mapanganib ang mga sakit na ito at humahantong, sa ilang pagkakataon, sa kamatayan. Kung sa palagay mo ay ang tubig na iniinom ninyo ang nagsanhi ng karamdaman sa inyong pamilya, tiyaking kumonsulta sa doktor.

Ligtas bang gumamit ng maruming tubig?

Mahalagang gumamit ng malinis na tubig para sa anumang bagay na pumapasok sa ating bibig o sumasayad sa ating pagkain. Dapat tayong gumamit ng malinis na tubig sa pagsisipilyo ng ating mga ngipin, pagtimpla ng juice o infant formula, paghuhugas ng mga prutas at gulay, at paghuhugas ng mga pinggan. Dapat din tayong gumamit ng malinis na tubig kapag naliligo at naghuhugas ng ating mga kamay.

Paano nagiging marumi ang tubig?

Ang tubig ay maaaring maging kontaminado ng mga pollutant, toxin, contaminant, at iba pa. Maaari ding maging marumi ang tubig kung nakalagay iyon sa maruruming lalagyan o kung hindi ito naimbak nang wasto. Ang maruming tubig, pati na yaong matatagpuan sa maruruming pinagmulan, ay dapat i-purify palagi bago inumin.

Paano ko malalaman kung malinis ang tubig?

Ang pinakamainam na paraan para matiyak na malinis ang tubig ay kumuha ng tubig sa mga mapagkukunan na napatunayang ligtas — halimbawa, ligtas na bottled water o ligtas na tubig sa balon.

Bottled water

Ang bottled water ay karaniwang ligtas kung hindi sira ang seal sa takip. Ang bottled water ay hindi ligtas kung ang bote ay nasalinan ng maruming tubig.

Tubig sa balon

Ang tubig sa balon ay karaniwang ligtas kung ang balon ay:

• Malalim, may takip, at madalas linisin.
• Walang anumang sira o tagas.

Paano ko ipu-purify ang maruming tubig?

Maaaring i-purify ang tubig sa pamamagitan ng pag-filter, pagpapakulo, at pag-disinfect. Ang proseso ng purification ay karaniwang may dalawang hakbang at gagawin nitong ligtas na gamitin ang tubig.

Step 1: Pagpapalinaw ng tubig 

Ang malabo o maruming tubig ay kailangan munang palinawin. Dapat itong salain sa pamamagitan ng filter paper, pinong tela, o iba pang filter. Maaari mo ring hayaang tumining ang dumi sa ilalim, pagkatapos ay maingat na salukin ang malinaw na tubig sa ibabaw. Ang na-filter o napalinaw na tumining na tubig ay dapat i-disinfect palagi bago gamitin.

Step 2: Pag-disinfect ng Tubig 

• Pagpapakulo: Kapag pinakuluan nang husto ang tubig sa loob ng tatlo hanggang limang minuto, mamamatay ang karamihan sa mga microorganism sa tubig. Ang tubig na nasa mas mataas na lugar ay kailangang pakuluan nang mas matagal. Gayunman, ang matagal na pagpapakulo ng kakaunting tubig ay maaaring magpa-concentrate ng nakalalasong mga contaminant kung mayroon nito ang tubig.
• Paggamit ng bleach: Ang pagdaragdag ng walong patak ng fresh liquid household chlorine bleach (5 porsiyento hanggang 9 na porsiyentong sodium hypochlorite) sa bawat apat na litro (isang galon) ng tubig ay papatayin ang karamihan sa mga microorganism. Gumamit lamang ng household bleach na walang mga thickener, scent, o additive. Hindi nawawala ang nakakalasong contaminant sa paggamit ng bleach.
• Mga water filter: Ang ilang nabibiling water filter ay maaaring epektibong mag-filter at mag-purify ng tubig na kontaminado ng mga microorganism, nakalalasong mga kemikal, at heavy metals. Ang pagiging epektibo ng mga ito ay depende sa disenyo, kundisyon, at wastong paggamit.

Paano ko dapat imbakin ang tubig para manatili itong malinis?

Maglagay ng tubig sa malilinis na lalagyan, pagkatapos ay gawin ang sumusunod:

• Takpan nang mahigpit ang mga lalagyan
• Lagyan ng petsa
• Itago sa malamig at madilim na lugar

Dahil maraming lalagyan na malinaw at maaaring tumagos ang liwanag sa mga ito, maaari mong takpan o ilagay ang mga ito sa itim na mga plastic bag. Maaari ding mangailangan ng proteksyon ang ilang lalagyan mula sa pagyeyelo: Kung gumagamit ng bottled water na binili sa tindahan, gamitin ang mga petsang “best if used by” bilang patnubay sa pagpapalit. Kung hindi, palitan ang tubig kada anim na buwan.

Paano ko matutulungan ang iba na magkaroon ng access ng ligtas na inuming tubig?

Matutulungan ng mga ministering brother at sister, gayundin ng mga lider, ang mga pinaglilingkuran nila na magkaroon ng access sa ligtas at malinis na tubig. Isipin ang mga sumusunod na rekomendasyon.

Mga Ministering Brother at Sister

• Pag-aralan at ibahagi ang mga lokal na mapagkukunan ng malinis na tubig at mga pamamaraan sa paglilinis ng tubig.
• Kung nagpapakita ng mga palatandaan ang isang tahanan na hindi ligtas ang inuming tubig sa kanila, sumangguni sa mga elder’s quorum at Relief Society presidency.

Mga Lokal na Lider

• Paigtingin ang kamalayan tungkol sa kahalagahan ng ligtas na inuming tubig.
• Makipagtulungan sa mga lider ng komunidad para matukoy o magkaroon ng mga mapagkukunan ng malinis na tubig. Pagkatapos ay ipaalam sa mga pamilya ang mga mapagkukunang ito.
• Magturo ng mga praktikal na paraan ng pag-purify ng tubig. Ang isang paraan para magawa ito ay magdaos ng mga klase para ituro ang mga palatandaan ng hindi ligtas na inuming tubig, mga pamamaraan ng pag-purify ng tubig, at wastong pag-iimbak ng malinis na tubig.
• Kung hindi maka-access ang isang pamilya sa malinis na tubig, isipin kung paano tutulong sa mga agarang pangangailangan. Gayundin, makipagtulungan sa kanila para makahanap ng mas pangmatagalang solusyon.
• Makipagtulungan sa inyong welfare and self-reliance manager (WSRM), na makakatulong sa pagbubuo ng mga solusyon para magkaroon ng malinis na tubig. Maaari ding magbigay ng suporta ang mga WSRM sa pamamagitan ng pakikipagtuwang sa mga agency at organisasyong hindi pag-aari ng gobyerno para tumulong na malunasan ang mga lokal na pangangailangan sa tubig.