Feituʻu Naʻe Fanauʻi ai ʻa Siosefa Sāmitá

Naʻe fanauʻi ʻa Siosefa Sāmita ʻi he ʻaho 23 ʻo Tīsema 1805, kia Lusi Meki Sāmita mo Siosefa Sāmita ko e Lahí. ʻI he taimi ko iá, naʻe nofo ʻa e fāmili Sāmitá ʻi ha kiʻi ʻapi siʻisiʻi ʻi ha faama ʻa e tamai ʻa Lusí, ko Solomone Meki. ʻI he fakamanatua ʻo e taʻu 100 ʻo e fanauʻi ʻo Siosefa Sāmita ko e Siʻí, naʻe fokotuʻu ai ha maka fakamanatu kalānite fute ʻe 50 ʻi he feituʻú. ʻI he ʻahó ni, ʻoku hoko ʻa e kelekele ʻi he feituʻu naʻe fanauʻi aí ko ha feituʻu ke fakakaukauloto ai ʻa ia ʻoku fakaʻatā ki he kakaí. ʻOku ʻomi ʻe ha senitā maʻá e kau ʻaʻahí ha fakamatala fekauʻaki mo e moʻui ʻa Siosefa Sāmitá mo hono misiona ko e palōfitá naʻe kamata ke fakafoki mai ai ʻe Sīsū Kalaisi ʻEne ongoongoleleí ki he māmaní.

Naʻe hoko ʻa Siosefa Sāmita ko e fika nima ʻi he fānau ʻe toko 11 ʻa Lusi Meki Sāmita mo Siosefa Sāmita ko e Lahí. Naʻá na nofo ʻi he faama ʻa Solomone Mekí ʻi ha taʻu ʻe tolu lolotonga ʻena ngāue ke ikunaʻi ha ngaahi faingataʻaʻia fakapaʻanga kimuʻa. Naʻe faifai pea kumi ngāue ʻa Siosefa Sāmita ko Lahí ʻi Niu ʻIoke, pea naʻe fokotuʻu ai ʻe he fāmilí ha faama ʻi Manisesitā, Niu ʻIoke, ʻo ofi ki he kolo ko Palemailá. ʻI he faama ko iá, naʻe aʻusia ai ʻe Siosefa ʻa e ʻUluaki Mata Meʻa-hā-maí, ʻa ia naʻe ʻaʻahi mai ai ʻa e ʻOtua ko e Tamaí mo Sīsū Kalaisi kiate ia. Naʻe hoko ʻeni mo ha ngaahi fakahā fakalaumālie kehe ke tupunga ai hono pulusi ʻo e Tohi ʻa Molomoná mo hono fokotuʻu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.