Kau Palesitenisī ʻUluakí

Ko e kau mēmipa ʻo e Kau Palesitenisī ʻUluakí ko e kau ʻAposetolo kinautolu ʻa Sīsū Kalaisi. Fakataha mo e kau ʻAposetolo kehé, ko ha kau fakamoʻoni makehe kinautolu ʻo Sīsū Kalaisi, kuo uiuiʻi ke akoʻi mo fakamoʻoni kiate Ia ʻi he funga ʻo e māmaní. ʻOku nau faʻa fefonongaʻaki, lea mo poupouʻi ʻa e ngaahi haʻofanga tokolahi ʻo e kāingalotu ʻo e Siasí mo e niʻihi kehé, pea pehē foki ki heʻenau fakataha mo e kau taki ʻo e Siasí. ʻOku nau fekumi ki ha fakahinohino meia Sīsū Kalaisi ʻi heʻenau tokangaʻi ʻa e ngaahi meʻa ʻoku fekauʻaki mo e kāingalotu ʻe laui miliona ʻo e Siasí ʻi he funga ʻo e māmaní. ʻOku kau ʻi he ngaahi meʻá ni ʻa e ngāue fakafaifekaú, tokoni ʻofa fakaetangatá, ngāue fakatemipalé, fakahinohino ʻo e ongoongoleleí, mo ha ngaahi meʻa lahi ange.

Ko e Palesiteni ʻo e Siasí ʻa e ʻAposetolo fuoloa tahá maʻu pē—ko e tokotaha ia kuo fuoloa taha ʻene hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻI he taimi ʻoku pekia ai ha Palesiteni ʻo e Siasí, ʻoku hoko leva ʻa e ʻAposetolo fuoloa taha hono hokó ko e Palesiteni ʻo e Siasí peá ne fili hano ongo tokoni ke ngāue mo ia ʻi he Kau Palesitenisī ʻUluakí. Neongo ʻoku hikinimaʻi ʻa e kau mēmipa kotoa pē ʻo e Kōlomu ʻo e Kau ʻAposetolo ʻe Toko Hongofulu Mā Uá ko e “kau palōfita, kau tangata kikite, mo e kau tangata maʻu fakahā,” ka ʻoku ʻuhinga ʻa e foʻi lea “palōfitá” ki he Palesiteni ʻo e Siasí.

ʻOku ʻomi ʻe he ʻEikí ʻo fakafou ʻi he ngaahi pōpoaki fakalaumālie ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá, ha fakahinohino ki Hono Siasí, kau ai ha fakahinohino ʻe tokoni ki he kāingalotú ʻi he ngaahi faingataʻa ʻoku nau aʻusia ʻi he moʻuí.

Naʻe ʻuluaki fokotuʻu ʻa e Kau Palesitenisī ʻUluakí ʻe Siosefa Sāmita, ko e ʻuluaki palōfita ʻo e Siasí.