Ko e Fale Punungahoné
Ko e Fale Punungahoné ko e nofoʻanga fakaʻofisiale ia ʻo e Kau Palesiteni ʻe toko tolu ʻo e Siasí: Pilikihami ʻIongi, Lōlenisō Sinou, mo Siosefa F. Sāmita. ʻOku tuʻu ʻa e fale fungavaka tolú ʻi he loto kolo ʻo Sōleki Siti, ʻIutaá ʻi he mangafā ʻo e Hala Siteití mo e Temipale Sauté. Naʻe kōvana foki ʻa Pilikihami ʻIongi ʻi he Vahefonua ʻIutaá, pea naʻe fakaʻaongaʻi foki ʻa e Fale Punungahoné ke talitali mo fakameʻite ai ki he kau ʻaʻahi ki he vahefonuá. Kuo fakaleleiʻi ʻa e ʻapí ki hono fōtunga ʻi he senituli hongofulu mā hivá pea ʻoku fakaava ia ki he ngaahi takimamatá.
Naʻe langa ʻa e Fale Punungahoné ʻi he 1854. ʻOku maʻu hono hingoá mei he tā-tongitongi ʻo e punungahoné ʻokú ne teuteuʻi ʻa e konga ki ʻolunga ʻo e fale nofoʻangá—ko ha fakaʻilonga fakaemāmani lahi ʻa e Siasí ʻo e fetokoniʻakí, faʻa ngāué, mo e ngāue mālohí. Ko e tokotaha tā palani ʻo e falé ko Truman Angell [Tulumani ʻEnisela], ʻa ia naʻá ne tā ʻa e Temipale Sōlekí ʻi he taimi tatau. Naʻe hoko ʻa e Fale Punungahoné ko e fakamaʻunga ki he ʻū koloa lalahi ʻa Pilikihami ʻIongí pea naʻe hoko ia ko ha ʻapi fakafāmili ki ha ngaahi toʻu tangata lahi ʻo e kau taki ʻo e Siasí.
Naʻe langa ʻa e Fale Punungahoné pea mo e Fale Laioné ke nofo ai e fāmili tokolahi ʻo Pilikihami ʻIongí. ʻI he ngaahi fuofua ʻaho ʻo e Siasí, naʻe fakahoko ʻe ha kāingalotu ʻe niʻihi ʻo e Siasí, kau ai ʻa Pilikihami ʻIongi, ʻa e mali tokolahí, ʻo iku ai ki ha tokolahi ʻa e fānaú. Naʻe hoko ha fakahā naʻe fai ki he fuofua palesiteni mo e palōfita ʻo e Siasí ko Siosefa Sāmitá, ke kamataʻi ai hono fakahoko ʻo e meʻá ni ʻi he uhouhonga ʻo e kāingalotú ʻi he konga kimuʻa ʻo e 1840 tupú. Naʻe hoko ha fanongonongo fakamafaiʻi ʻi he 1890 ke fakangata ai hono fakahoko ʻo e mali tokolahí ʻi he Siasí. Naʻe hoko ha ongo ʻōfisi iiki ʻi he kaungāʻapi ʻo e Fale Punungahoné ko ha hetikuota ʻo e Siasí ʻi ha taʻu ʻe 60 tupu.
Hili ʻa e mālōlō ʻa Siosefa F. Sāmitá, naʻe hoko ʻa e Fale Punungahoné ko ha falemohe maʻá e kau finemui ʻoku nofo ʻi Sōleki Siti ke ngāue pe akó. Naʻe fakalele ʻa e ʻapí ʻe he houalotu ʻo e Kau Finemui ʻa e Siasí. Naʻe ola lelei ʻaupito ʻa e polokalamá, pea naʻe tokolahi ha kau finemui ʻo e Siasí naʻa nau nofo ʻi ʻapí ʻo aʻu ki he 1950 tupú.
Naʻe toe fakaava ʻa e Fale Punungahoné ko ha misiume fale fakahisitōlia ʻi he 1961 hili ha ngāue lahi ki hono fakaleleiʻí. ʻI he ʻaho ní, ʻoku nofotaha ʻa e takimamata ʻi he Fale Punungahoné ʻi he moʻui fakafāmilí mo e tuʻunga fakatakimuʻa ʻanautolu naʻe nofo ʻi he ʻapí ʻi he vahaʻa ʻo e 1854 mo e 1918.