O Le Fale o le Ofagapi
O le Maota o le Ofagapi o le nofoaga aloaia lea o Peresitene e toatolu o le Ekalesia: Polika Iaga, Lorenzo Snow, ma Iosefa F. Samita. O le fale fogafale-tolu o loo tu i le taulaga o le Aai o Sate Leki, Iuta, i le fetaulaiga ala o le State Street ma le South Temple. Sa avea foi Polika Iaga ma kovana o le Teritori o Iuta, ma sa faaaoga foi le Fale o le Ofagapi e tali ma faafiafia ai tagata asiasi atu i le teritori. Ua toefuatai le fale i ona foliga i le seneturi lona sefuluiva ma ua tatala mo maimoaga.
Sa fausia le Fale o le Ofagapi i le 1854. Ua maua lona igoa mai le faatagata vane o le ofagapi lea e teuteu ai le tumutumu o le faletele—o se faatusa o le galulue faatasi, alamanuia, ma le galue malosi i le Ekalesia atoa. O le tusiata o le fale o Truman Angell, o le sa mamanuina le Malumalu o Sate Leki i le taimi lava lea e tasi. O le Fale o le Ofagapi o le taula lea o meatotino tetele a Polika Iaga ma sa o se fale o le aiga mo le tele o augatupulaga o taitai o le Ekalesia.
Faatasi ai ma le Fale o le Leona, sa fausia ai le Fale o le Ofagapi ina ia ofi ai le aiga toatele o Polika Iaga. I aso popofou o le Ekalesia, sa faia ai e nisi o tagata o le Ekalesia, e aofia ai ma Polika Iaga, faaipoipoga autaunonofo, na iu ai i ni fuainuera toatele o tamaiti. O se faaaliga na tuuina mai i le uluai peresitene ma le perofeta o le Ekalesia, o Iosefa Samita, na faavaeina ai lea faiga i tagata o le ekalesia i le amataga o le vaitaimi o le 1840. O se manifeso aloaia i le 1890 na taitai atu ai i le faamutaina o le faiga o faaipoipoga autaunonofo i le Ekalesia. O ni ofisa laiti se lua na sosoo ma le Fale o le Ofagapi sa avea ma laumua o le Ekalesia mo le silia ma le 60 tausaga.
Ina ua mavae le maliu o Iosefa F. Samita, sa oo ina avea le Fale o le Ofagapi ma se fale e nonofo mautotogi ai tamaitai talavou sa nonofo i le Aai o Sate Leki mo galuega po o aoaoga. Sa faagaoioia le fale e le faalapotopotoga a Tamaitai Talavou a le Ekalesia. Sa matuai faamanuiaina lava le polokalama, ma e toatele tamaitai talavou o le Ekalesia sa potu i le fale seia oo i le 1950.
O le Fale o le Ofagapi na toe tatalaina o se falemataaga o fale lauiloa i le 1961 ina ua mavae se galuega faatino tele o le toefuataiga. I le taimi nei, o le maimoaga i le Fale o le Ofagapi e taulai atu i le olaga faaleaiga ma le faaleautaitai mo i latou sa nonofo i le fale i le va o le 1854 ma le 1918.