Ang Beehive House
Ang Beehive House mao ang opisyal nga pinuy-anan sa tulo ka Presidente sa Simbahan: Brigham Young, Lorenzo Snow, ug Joseph F. Smith. Ang tulo ka andana nga balay nahimutang sa downtown sa Siyudad sa Salt Lake, Utah, diha sa interseksiyon sa State Street ug South Temple. Si Brigham Young mao usab ang gobernador sa Teritoryo sa Utah, ug ang Beehive House mao usab ang gigamit sa pagdawat ug pag-abiabi og mga bisita sa teritoryo. Ang balay gipahiuli sa ika-desinuybe nga siglo nga hitsura niini ug bukas alang sa paglibot.
Ang Beehive House gitukod niadtong 1854. Nakuha ang ngalan niini gikan sa kinulit nga balay sa putyokan nga giadorno sa ibabaw sa mansyon—usa ka simbolo sa tibuok Simbahan nga pagtinabangay, pagkugi, ug pagpaningkamot. Ang arkitekto sa bilding mao si Truman Angell, kinsa mao ang nagdisenyo sa Salt Lake Temple sa samang higayon. Ang Beehive House mao ang labing mahinungdanong propyedad nga naangkon ni Brigham Young ug usa ka panimalay sa pamilya sa daghang henerasyon sa mga lider sa Simbahan.
Kauban sa Lion House, ang Beehive House gitukod aron mapahiluna ang dakong pamilya ni Brigham Young. Sa unang mga adlaw sa Simbahan, pipila ka miyembro sa Simbahan, lakip ni Brigham Young, nagpraktis og dinaghan nga kaminyoon, nga miresulta sa daghang mga anak. Usa ka pagpadayag ang gihatag sa unang presidente ug propeta sa Simbahan, si Joseph Smith, maoy nagsugod sa pagpraktis niini sa mga miyembro sa sayong bahin sa mga 1840. Usa ka opisyal nga manipesto niadtong 1890 ang nanguna sa pagtapos sa pagpraktis sa dinaghan nga kaminyoon diha sa Simbahan. Duha ka gamay nga opisina tupad sa Beehive House ang nagsilbi nga punoang buhatan sa Simbahan sulod sa sobra 60 ka tuig.
Pagkahuman sa kamatayon ni Joseph F. Smith, ang Beehive House nahimong puy-anan alang sa batan-ong mga babaye nga nagpuyo sa Siyudad sa Salt Lake aron magtrabaho o mag-eskwela. Ang balay gidumala sa organisasyon sa Young Women sa Simbahan. Malamposon kaayo ang programa, ug daghang batan-ong babaye sa Simbahan ang mipuyo sa maong balay hangtod sa mga tuig 1950.
Ang Beehive House giablihan pag-usab isip usa ka makasaysayanong balay nga museyo niadtong 1961 human sa usa ka dakong proyekto sa pagpahiuli niini. Karon, ang Beehive House nga paglibot nagtumong sa kinabuhi ug pagpangulo sa pamilya alang niadtong kinsa nagpuyo sa maong balay tali sa 1854 ug 1918.